Трамп наспроти Обама и Бајден: Пазарите велат дека никогаш не било полошо за вториот мандат на Доналд

Глобалните пазари сѐ уште се справуваат со огромната неизвесност што ја предизвикуваат променливите политики на американската администрација предводена од претседателот Доналд Трамп, кој буквално на дневна основа воведува нови царини и ограничувања во обид да ги репозиционира САД во светската трговија, а често ретерира од своите одлуки и ги одложува зададените рокови за новите давачки како тактика да наметне преговори што би завршиле во корист на неговата земја.

Засега ваквата економска политика не им оди во прилог на пазарите односно инвеститорите, кои пред сѐ сакаат предвидливост кога носат одлуки каде да ги вложат своите пари. Тоа го покажува и анализата на движењето на вредноста на најважните класи на средства од почетокот на мандатите на последните четири американски претседатели. Речиси сите средства имаат подобри резултати во првите двесте и нешто дена од мандатите на поранешните претседатели Барак Обама и Џо Бајден, па дури и во првиот мандат на Трамп, отколку во истиот број денови од неговиот актуелен мандат.

Индексот S&P 500 е најследениот американски репер за инвестиции во акции и како таков се смета и за показател во реално време за тоа како политиките на претседателот Трамп влијаат врз корпоративна Америка. Индексот падна на почетокот на 2025 година поради загриженоста за заканите со царини на Трамп, а потоа почна да закрепнува бидејќи претседателот го одложи спроведувањето на многу од нив, а вистинските стапки на некои давачки беа пониски од првично предложените. Сепак, графиконот подолу јасно покажува дека овој индекс многу побрзо растел во првите двесте дена од мандатите на Обама и Бајден.

Слична судбина имаше и индексот Nasdaq, кој во првиот квартал од годинава имаше пад од 8,3 проценти, што е најлош резултат во речиси три години. Големо влијание врз ваквиот резултат освен недовербата во вештачката интелигенција, имаа и политиките „повлечи-потегни“ на претседателот Трамп околу новите царини за чиповите и трговските политики со Кина. Иако индексот подоцна во теков на годинава почна да расте, досегашниот резултат е убедливо најлош споредено со остварениот раст во истиот број денови од претходните три претседателски мандати.

Според „Блумберг“, американскиот долар стана еден од најдобрите барометри за прифаќањето или отфрлањето на политиките на претседателот Трамп од страна на глобалните инвеститори. Неколку клучни столба на агендата на Трамп, како што се зголемувањето на царините и намалувањето на даноците на сите нивоа - што може да доведе до поголем фискален дефицит и поголем долг - придонесоа за поостри осцилации на американската валута. Како резултат на тоа, инвеститорите ја преиспитуваат вредноста на доларот под водство на Трамп.

Веќе пишувавме и дека претседателот Трамп со невиден и сè поостар притисок врз Федералните резерви ризикува да предизвика контраефект, со повисоки долгорочни трошоци за задолжување што може да ги погоди финансиските пазари и економијата. Со месеци тој го критикува претседателот на Фед, Џером Пауел, зашто не ги намалил каматните стапки поодлучно за да ја стимулира економијата и, според Трамп, да ги намали трошоците на владата за сервисирање на државниот долг.

Трамп веќе го номинираше шефот на својот Совет на економски советници во управниот одбор на централната банка, а сега се обидува да ја разреши гувернерката Лиза Кук, отворајќи пат за правна битка околу политичката независност на институцијата. И иако Пауел сигнализира дека е подготвен да почне со олабавување на монетарната политика, каматните стапки упорно остануваат високи од други причини: царините се закануваат да ја влошат и онака зголемената инфлација; буџетскиот дефицит е на пат да продолжи да го преплавува пазарот со нови обврзници; а даночните олеснувања на Трамп може дури и да донесат нов стимуланс следната година.

Актуелниот американски претседател застана зад криптоинтересите и почна да работи на попријателска регулаторна средина и поголемо усвојување дигитални средства на американска почва. Сепак, графиконот подолу покажува дека резултатите на биткоинот биле многу подобри во првите двесте и нешто дена од неговиот прв мандат.

Всушност, единствено златото има поголем принос во вториот мандат на Трамп, што е лесно да се објасни со оглед на тоа што станува збор за средство што се користи како засолниште во услови на огромна неизвесност на пазарите.