Од чипови до антимон - како политиките на Трамп ги диктираат трендовите на берзата

Адам Гиденс претходно се потпираше главно на платформите за пребарување акции и шпекулациите на социјалните медиуми за да пронајде акции за купување. Но, во последно време вниманието му го провлече поинаков тип инфлуенсер: Доналд Трамп.

Како што администрацијата на Трамп сè повеќе скршнува од досегашната практика и презема сопственички удели во јавни компании во име на Соединетите Американски Држави, трговците како Гиденс се обидуваат да размислуваат како Трамп за да ги пронајдат своите следни цели. На крајот на краиштата, цените на акциите обично растат по веста дека владата на САД презема удел во некоја компанија.

Во последно време Гиденс го насочи своето внимание кон „Милитари металс“ (Military Metals Corp.), која истражува нови извори на антимон - материјал што се користи во воена опрема како што се експлозиви, производство на нуклеарно оружје и инфрацрвени сензори. Кина во моментов е најголемиот производител на антимон, а Русија е значаен снабдувач.

„Таа комбинација од стратешка важност и ранливост на синџирот на снабдување ми го привлече вниманието, па почнав да барам јавни компании со изложеност на антимон“, рече Гиденс, кој од неодамна внимателно ги проучува и владините документи во потрага по потенцијални инвестиции. „Со оглед на големината и локацијата на нивните ресурси, мислам дека тие се силен кандидат за следниот бран стратешки инвестиции во овој сектор.“

Шпекулациите меѓу трговците доаѓаат во време кога администрацијата инвестира во компании за да го постигне тоа што ги нарекува клучни стратешки цели - обезбедување синџири на снабдување со полупроводници и спречување на Кина да ги прекине испораките на критичните минерали. Во подготовка е дури и фонд со кој ќе се тргува на берза: „Рондхил фајненшл“ (Roundhill Financial Inc.) поднесе барање до регулаторите за лансирање на ЕТФ кој би инвестирал во индустрии кои ја отсликуваат инвестициската стратегија на американската влада.

Ваквите инвестиции предизвикаа критики бидејќи означуваат драматичен пресврт во однос на политиките на претходните претседатели, особено републиканците кои долго време се залагаа за слободни пазари и го избегнуваа вклучувањето на владата во сопственичката структура на корпорациите. Сепак, тие се теми за политичари, економисти и академици. За професионалните менаџери на фондови и индивидуалните трговци како Гиденс, постои многу поважно прашање: што е следно?

Портфолиото на Гиденс веќе е зголемено со акции во една од компаниите што ги избра Белата куќа.

Depositphotos

 

31-годишниот жител на Ванкувер, кој работи во областа на пазарите на капитал и во слободно време тргува со акции, рече дека купил акции на „МП Материалс“ (MP Materials Corp.) пред Пентагон во јули да преземе 15 проценти од акциите во компанијата, што предизвика пораст од 95 проценти на вредноста на производителот на ретки земни метали кои се важни за електричните возила, роботиката и широк спектар на електроника.

Фокусот на Трамп на индустриската политика и неговото верување во владина интервенција и насочување на пазарот го менуваат начинот на кој инвеститорите треба да ги оценуваат компаниите, рече Аникет Шах, глобален директор за одржливост и стратегија за транзиција во „Џефрис фајненшл груп“ (Jefferies Financial Group Inc.), која ги следи економските импликации од политиките на Трамп.

„Дел од идната деловна анализа треба да биде и политичкиот однос со државата“, рече Шах. По „МП Материалс“, владата ги искористи обврските за поддршка преземени од страна на „Интел“ (Intel Corp.) според Законот „CHIPS“, донесен за време на мандатот на Џо Бајден, за во август да купи речиси 10 проценти од акциите на компанијата, со цел да му помогне на производителот на чипови, кој инаку се бори да преживее.

Следниот месец се постигна договор за преземање на пет проценти од акциите на „Литиум америкас“ (Lithium Americas Corp.), а потоа и 10 проценти од акциите на истражувачот на критични метали „Трилоџи металс“ (Trilogy Metals Inc). Американскиот министер за трговија, Хауард Лутник, наговести дека на маса се и потенцијални инвестиции во одбрана. Не е изненадувачки што најпопуларната технологија што го поттикна растот на пазарот оваа година - вештачката интелигенција (ВИ) - сега се користи за идентификување на следните цели.

Кол Хансен, аматерски трговец од Бостон кој работи во сектор за поддршка на услуги за испорака и транспорт, ги праша популарните чет-ботови како „Чет ГПТ“ (ChatGPT) на „Опен еј-ај“ (OpenAI) зошто Трамп избрал одредени индустрии, што имаат тие заедничко и кои би можеле да бидат следните цели. Кога моделите предложија енергија, компјутери и роботика, Хансен почна да истражува производители на батерии. Подоцна, разговорите со ботовите му помогнаа да се фокусира на производителите на графит.

„Повеќето модели на вештачка интелигенција дадоа исти одговори. Кога конкретно прашав кои се заедничките карактеристики на постојните инвестиции, моделите почнаа да ги споменуваат индустриите доминирани од Кина и го истакнаа графитот како еден од најважните материјали“, рече Хансен.

Потоа Хансен наишол на „Новоникс“ (Novonix Ltd.), компанија која во декември добила заем до 755 милиони долари од Министерството за енергетика на САД за изградба на првата голема фабрика за синтетички графитни батерии во земјата. Тој сметал дека акциите на компанијата се „совршено позиционирани“ за да имаат корист од трендот на владини инвестиции. Но, откако инвестирал во средината на октомври, акции на австралиската компанија паднале за околу 40 проценти.

Брајан Лакс, партнер и портфолио менаџер во „Олд вест инвестмент менаџмент“ (Old West Investment Management), верува дека компаниите што се занимаваат со рударење на морското дно, како што се „ТМЦ металс компани“ (TMC The Metals Company Inc.) и „Одисеј марин експлорејшн“ (Odyssey Marine Exploration Inc.), би можеле да станат следните цели за владини инвестиции. Администрацијата на Трамп во април издаде извршна наредба за рударството на морското дно, а темата беше предмет на конгресните сослушувања.

„Олд вест“ веќе имаше инвестиции во „МП Материалс“, „Литиум америкас“ и „Трилоџи металс“ пред владата на САД да преземе удел, очекувајќи дополнително да ги вреднува изворите на критични минерали надвор од Кина, рече Лакс.

Bloomberg

 

За некои трговци, како Метју Татл од „Татл капитал менаџмент“ (Tuttle Capital Management), имаше можности да профитираат од потезите на владата дури и откако беа објавени. Тој во октомври потпиша опција за продажба на акциите на „Интел“, обложувајќи се дека нивната вредност ќе се зголеми бидејќи инвеститорите го следат примерот на САД. Тој ја затвори позицијата на 5 ноември со профит.

„Еј, бев во право“

Татл вели дека не се обидува да предвиди која компанија ќе биде следна, но трендот ги зајакнува неговите верувања за секторите во кои веќе инвестира - вклучувајќи ги критичните минерали и беспилотните летала, за кои очекува дека ќе добијат владина поддршка.

„Владата веројатно нема да инвестира во сектор за кој веќе не сум размислувал, но фактот дека го прави тоа значи дека 'еј, бев во право'“, рече Татл. „И некој друг го прави тоа, некој со многу подлабоки џебови и многу поширок дострел.“

Иако американските инвестиции во моментов предизвикуваат барем краткорочни скокови на цените на акциите, каде ќе водат на долг рок - останува неизвесно.

„Чекор кон социјализмот“

Изборот на акции од страна на владата предизвика критики дури и во самата партија на Трамп, при што републиканскиот сенатор Ранд Пол ја критикуваше одлуката на Белата куќа да купи удел во „Интел“ како понатамошен „чекор кон социјализмот“. Аналитичарите, исто така, изразија скептицизам во врска со идејата на Лутник владата да инвестира во компании поврзани со одбраната, при што „Џефрис“ предупреди дека тоа би можело да биде „екстремен конфликт на интереси“.

 

Постојат и долгорочни ризици за акционерите. Компаниите фаворизирани од владата би можеле да станат помалку ефикасни ако се заштитени од конкуренцијата на пазарот, вели Мет Герткен, главен геополитички стратег во „БЦА Рисрч“ (BCA Research). Или, како што се случи во Кина, владата би можела да создаде толку жестока конкуренција што компаниите повеќе нема да можат да остварат профит.

Секако, ваквите шпекулации носат голем ризик ако инвеститорите изберат компании кои на крајот нема да привлечат владини инвестиции. Акциите на „Критикал металс“ (Critical Metals Corp.) скокнаа за дури 109 проценти за еден ден по извештаите дека администрацијата размислува за инвестиција во таа компанија, но и нагло паднаа истиот ден кога еден официјален претставник рече дека таков договор во моментов не е на маса. Акциите на „Енерџи фјулс“ (Energy Fuels Inc.) и „Рамако рисурсис“ (Ramaco Resources Inc.) пораснаа минатиот месец кога „Б. Рајли секјуритис“ (B. Riley Securities) ги зголемија своите ценовни цели и изјавија дека е веројатна понатамошна владина интервенција во секторот на ретки метали. Но, тие добивки брзо беа избришани.

Досега, нема знаци дека владата ја напушта својата стратегија - потрагата продолжува.

„Во моментов постои моментум да се обезбеди заштита за некои од овие компании и да се зајакнат синџирите на снабдување“, рече Герткен од „БЦА Рисрч“. „Во одреден момент во иднина тоа би можело да се промени поради неефикасност, дефицит или инфлација. Но, засега, важно е инвеститорите да знаат во која насока дува ветрот.“

 

— Во пишување на текстот помогна и Јикин Шен.