Берзански преглед: Рекордна недела за благородните метали, и S&P 500 близу рекорд

Иако минатата недела берзанското тргување беше ограничено поради божиќните празници, не недостасуваа берзански вести. На глобалните берзи се постигнуваа рекорди: од злато, сребро па сè до бакар, а близу рекордна вредност се движеше и американскиот индекс S&P 500. Да одиме по ред.

Златото и среброто скокнаа на рекордни вредности. Тензиите во Венецуела, каде што САД блокираа танкери со нафта и го засилија притисокот врз владата на Николас Мадуро, ја зголемија привлечноста на благородните метали како сигурно засолниште. Во Африка, САД изведоа силен и смртоносен удар против терористичка група во Нигерија, што дополнително ја зголеми привлечноста на златото. За една унца злато (31,1 грам) во петокот требаше да се платат околу 4.540 долари.

Среброто во меѓувреме првпат ја надмина вредноста од 75 долари за унца. Неодамнешниот раст на оваа благородна метална суровина беше поддржан од шпекулативни приливи и постојани нарушувања во снабдувањето во главните трговски центри по историското „истиснување“ на кратките позиции во октомври.

„Растот на златото и среброто во моментов го поттикнува комбинација од трајна физичка побарувачка и повторна чувствителност на макроекономските ризици,“ изјави за „Блумберг“ Џон Фини, директор за развој на бизнис во компанијата „Гардијан Валтс“. „Гледаме дека замавот се засилува и не се смирува, што укажува на цврсто уверување кај инвеститорите, а не само на шпекулативна еуфорија.“

Златото годинава доби околу 70 проценти, а среброто повеќе од 150 проценти, при што двата метала се на пат кон најдобрите годишни приноси од 1979 година. Силниот раст беше поддржан од зголемени купувања од централните банки, приливи во берзански трговски фондови (ETФ) и три последователни намалувања на каматните стапки од американската централна банка.

Неделата беше рекордна и за бакарот. Во петок достигна рекорд во Шангај и се зајакна и на други пазари, со што ги зголеми значителните годишни добивки, бидејќи инвеститорите се обложуваат на поограничена светска понуда во 2026 година, а во цените се вклучува и ефектот од послабиот американски долар. Во Кина, цените за првпат се зголемија на речиси 100 илјади јуани (14.230 долари) за тон на шангајската берза на фјучерси, пренесе „Блумберг“.

Ќе бидеме ли сведоци на божиќен раст?

Акциите во скромен обем на тргување го продолжија растот, поттикнат од оптимизмот за економскиот развој и очекувањата за подобрени добивки на компаниите. Иако индексот S&P 500 поради забавување на трансакциите едвај се придвижи, сепак забележа најдобра недела во последниот месец. Поголемиот дел од компаниите со голема пазарна капитализација забележаа пад, но акциите на „Енвидија“ се зголемија поради лиценцен договор со ВИ-стартапот „Грок“ (Groq).

На пазарот сè уште се шпекулира дали ќе дојде до таканаречениот „божиќен раст“, кој обично опфаќа раст на акциите во периодот од последните пет трговски денови во старата и првите два дена во новата година. „Декември е, историски гледано, еден од најсилните месеци за пазарите, а оваа година започна со доза оптимизам поради очекувањата дека 2026 година би можела да донесе пониски каматни стапки,“ изјави неодамна Матеј Вујаниќ, аналитичар во „Блумберг Адрија“. „Сепак, имајќи го предвид годинешниот макроекономски контекст, расположението на потрошувачите и динамиката на празничната потрошувачка, прашањето дали познатиот сезонски образец навистина ќе се повтори останува отворено.“

Факторите што придонесуваат за овој празничен раст на акциите вклучуваат празничен оптимизам, помал обем на тргување, искористување на даночни загуби и прилагодување на институционалните портфолија, наведуваат од глобалната финтек компанија „Плус500“. Ова е и време кога институционалните инвеститори се на одмор, што значи дека пазарите ги движат малите инвеститори, кои генерално се повеќе наклонети кон раст. Покрај тоа што божиќниот раст означува успешен трговски период, трговците го користат и како рана прогноза за тоа што може да се случи во новата година.

„Краткорочно верувам во Дедо Мраз,“ изјави за „Блумберг“ Стив Сосник од „Интерактив брокерс“. „Лесно би можел да се предвиди пораст на седум илјади поени само затоа што сме веќе толку блиску. Постојат причини зошто важи изреката ‘Не продавај на кратко кога пазарот е здодевен’.“ Индексот S&P 500 на крајот од тргувањето минатата недела се движеше околу 6.930 поени.

На ограничениот трговски ден на Бадник се случи неочекуван потег: акциите на компанијата „Најк“, која се соочува со проблеми, се зголемија и станаа најпродавани на пазарот, откако извршниот директор на „Епл“, Тим Кук, купи акции во вредност од 2,95 милиони долари. Кук, кој е водечки независен директор на „Најк“, речиси го удвои бројот на акции на компанијата што ги поседува.

Индексот VIX, кој ја мери очекуваната нестабилност на S&P 500, падна на најниско ниво годинава. Апетитот за ризик се засили кон крајот на годината, иако податоците за американскиот економски раст ги намалија очекувањата за скоро намалување на каматните стапки. По претходните грижи за високите вреднувања на технолошките акции во време на експанзија на вештачката интелигенција, пазарите повторно добиваат доверба дека компаниите во 2026 година ќе постигнат солиден раст на добивките, пренесува „Блумберг“.

Bloomberg

 

Како ќе биде со каматните стапки во 2026 година?

Ден пред Бадник од САД пристигнаа и макроекономски податоци. Американската економија во третиот квартал порасна најбрзо во последните две години. Бруто домашниот производ, приспособен на инфлацијата и кој ја мери вредноста на стоките и услугите произведени во САД, се зголеми за 4,3 проценти на годишно ниво, покажа извештајот на Канцеларијата за економска анализа во вторникот.

Пазарот во моментов предвидува само две намалувања на каматните стапки на Фед во наредната година. Американскиот претседател Доналд Трамп се залага за агресивно намалување на каматните стапки и оваа недела изјави дека наскоро ќе избере нов претседател на банката кој се согласува дека каматните стапки треба да бидат пониски.

Според економистите, пазарите со нетрепение ќе чекаат ново име за челната позиција во Фед кој ќе го замени актуелниот претседател Џером Пауел, чиј мандат истекува во мај. Како најверојатен наследник се споменува економскиот советник на Трамп, Кевин Хасет.

Слаба недела за доларот

Индексот на Блумберг за доларот ја забележа најслабата недела од јуни, бидејќи трговците очекуваа податоци што ќе бидат објавени на почетокот на следниот месец, за да ги потврдат очекувањата за понатамошно намалување на каматните стапки на американската централна банка во 2026 година.

Индексот на Блумберг за доларот во петокот беше стабилен и минатата недела се намали за околу 0,8 проценти. Оваа година падна за приближно осум проценти, што би бил неговиот најголем годишен пад од 2017 година.