Берзански преглед: Новото лице на Фед и големата распродажба на злато

Претседателот Доналд Трамп соопшти дека има намера да го именува Кевин Ворш за нов претседател на американската централна банка. „Кевин го познавам долго време и воопшто не се сомневам дека ќе се запише како еден од ГОЛЕМИТЕ претседатели на Фед – можеби дури и најдобриот“, напиша Трамп. „Покрај сè друго, тој е како од учебник за оваа улога и никогаш нема да ве разочара.“

Ворш, кој беше член на Одборот на гувернери на Фед од 2006 до 2011 година и претходно го советуваше Трамп за економската политика, треба да го наследи Џером Пауел кога во мај ќе му истече мандатот на чело на Фед. Тоа претставува враќање за 55-годишниот Ворш, кого Трамп во 2017 година го прескокна за оваа функција, кога го избра Пауел.

Обновениот апетит за компании што по период на послаби резултати го туркаа биковскиот пазар му овозможи на S&P 500 на средината на минатата недела првпат да ја надмине границата од 7.000 поени. Во петокот индексот благо се повлече и повторно се спушти под таа граница.

Во период на Волстрит обележан со концентрација на инвеститорите во исти зделки и со ентузијазам на малите инвеститори, седмицата зад нас покажа колку брзо може да исчезне уверувањето. Милијарди долари нагло се занишаа додека најпопуларните облози се сопнаа, при што силната изложеност на позициите оставаше многу мал простор за грешки.

Цените на металите паднаа кон крајот на неделата

Најсилен удар претрпеа благородните метали. Златото го забележа најостриот пад во последните децении, а среброто – најголемиот пад досега. Во петокот и златото и среброто нагло паднаа, со што се олади рекордниот раст, откако во јавноста излезе извештај дека администрацијата на Трамп се подготвува да го именува Ворш за претседател на Фед.

Среброто падна за повеќе од 16 отсто, на околу 96 долари за унца, додека златото загуби повеќе од седум отсто и се спушти под 5.000 долари, со што дополнително се засилија бурните движења што го прекинаа рекордниот раст.

Движењето кај златото ја потврдува предупредувачката приказна за брз раст и брз пад, изјави Кристофер Вонг, стратег во „Оверси“ (Oversea-Chinese Banking Corporation). Иако извештаите за именувањето на Ворш беа поттикнувачот, според него корекцијат одамна беше неопходна. „Ова е еден од оние изговори што пазарите ги чекаат за да можат да ги расплетат овие параболични движења.“

Во меѓувреме, рекорд постигна и бакарот. Црвената метална суровина во четвртокот забележа најголем скок во последните 16 години, поттикнат од бран интензивно шпекулативно тргување во Кина. Кинеските инвеститори масовно се насочуваат кон металите, водени од силниот замав што ги издигна цените на сè - од калај до сребро - на рекордни нивоа. Бакарот достигна цена од околу 14 илјади долари за тон.

Работењето на величествените седум

Минатата недела деловни резултати објавија четири од т.н. величествени седум технолошки гиганти.

„Тесла“ (Tesla) годинава планира потрошувачка од 20 милијарди долари за поедноставување на понудата на електрични возила и пренасочување на ресурсите кон роботика и вештачка интелигенција. Станува збор за дел од обемни промени што компанијата уште повеќе ја оддалечуваат од нејзините корени како производител на автомобили.

„Мета“ (Meta), која управува со повеќе социјални мрежи, во празничниот квартал ги надмина очекувањата за приходи и при објавувањето на деловните резултати во средата даде силна прогноза за тековниот период. Компанијата проценува дека годишните капитални расходи ќе изнесуваат меѓу 115 и 135 милијарди долари.

Потрошувачката на „Мајкрософт“ (Microsoft) порасна на рекордно ниво, додека растот на продажбата во облак забави. Загриженоста на инвеститорите дека инвестициите во вештачка интелигенција ќе се исплатат побавно од очекуваното предизвика значителен пад на цената на акцијата.

„Епл“ (Apple) во празничниот период забележа силен пресврт во Кина, каде што побарувачката за новиот „ајфон 17“ ѝ донесе на компанијата прв квартал со повеќе од 25 милијарди долари приходи во овој регион од крајот на 2021 година.