„Криптопазарот порано не ги следеше општите економски трендови, но сега ги следи, бидејќи на некој начин е интегриран во секојдневието“, вели за Блумберг Адрија ТВ Мартин Михајлов, научен истражувач од институтот „Јозеф Стефан“ во Љубљана.
„Во последната година пазарот е доста лош. Лани во ноември целата вредност на пазарот беше околу три илјади милијарди долари, додека денес таа вредност е околу илјада милијарди. Во текот на годината пазарот цело време паѓа, но тоа се поистоветува и со другите светски трендови“, објаснува Михајлов.
„Кога берзите растат, најверојатно ќе расте и криптопазарот, ако паѓаат, ќе паѓа и криптопазарот“, додава тој.
Михајлов нагласува дека инвестирањето во криптовалути е ризично, но дека не е поризично отколку вложување во обичен пазар, на пример, на акции.
„Вредноста на крипто не може да биде нула - исто како во реалноста кога вредноста на некоја фирма расте или паѓа, слично е и со вредноста на криптовалутите или криптосредствата. Вредноста од нула е само за нешто што би било тотално 'ѓубре', исто како во реалниот економски свет“, посочува Михајлов.
Во продолжение на разговорот тој зборуваше и за разликите меѓу криптосредствата и дигиталните валути.
Неодамнешната анализа на економскиот тим на „Блумберг Адрија“ покажа дека само 1,3 отсто од македонските граѓани поседуваат криптовалути, што е најмал процент во целиот регион.
Според Михајлов, во овој контекст не станува збор за претпазливост, колку што генерално во Македонија финансиската онлајн култура е драматично помала отколку во преостанатиот дел од Европа.
„Прво треба да се среди нормалниот начин на плаќање и луѓето да се чувствуваат удобно да плаќаат со картички или онлајн да користат дигитални банкарски производи, наспроти нешто што кај нас воопшто не е регулирано, како криптопазарот“, посочува тој.
.webp){kind=icon}
