Секој Македонец во просек чува по 3.700 евра во банка, а должи по 2.400

Вкупните депозити во македонските банки стигнаа до десет милијарди евра (614,8 милијарди денари) заклучно со јуни, со 12,9 отсто раст на годишно ниво. Депозитите на домаќинствата изнесуваат 6,69 милијарди евра, на корпоративниот сектор 2,87 милијарди евра, а остатокот од околу 440 милиони евра се на останатите финансиски институции, и непрофитните организации коишто им служат на домаќинствата и локалната самоуправа. Растот произлегува од повисоките депозити и на двата клучни сектори, при што поголем придонес имаат домаќинствата, покажуваат најновите податоци на Народната банка. 

 

 

Вкупните депозити на домаќинствата во јуни месец се речиси непроменети на месечна основа и изнесуваат 411,7 милијарди денари (6,69 милијарди евра). Ако земеме предвид дека во Македонија има околу 1,8 милиони жители според последниот попис, секој македонски граѓанин во просек во банка има по околу 3.700 евра. Во споредба со истиот месец минатата година, депозитите на домаќинствата се зголемени за 13,0 отсто како резултат на растот на депозитните пари, долгорочните депозити во денари и во странска валута и краткорочните депозити во денари, при забележан пад на краткорочните депозити во странска валута.

Вкупните депозити на корпоративниот сектор во јуни изнесуваат 176,4 милијарди денари (2,87 милијарди евра), бележат месечен раст од 3,1 отсто, во најголем дел како резултат на зголемувањето на депозитните пари, при дополнителен раст и на краткорочните депозити во денари, додека краткорочните депозити во странска валута и долгорочните депозити во денари и во странска валута забележаа пад. На годишна основа, депозитите на корпоративниот сектор остварија зголемување од 14,6 отсто под влијание на растот на депозитните пари, краткорочните депозити во денари и во странска валута и долгорочните депозити во денари, во услови на остварен пад на долгорочните депозити во странска валута.

Во јуни 2025 година, вкупните кредити се зголемени за 1,6 отсто и 13 отсто на месечно и на годишно ниво, респективно, и изнесуваат 8,5 милијарди евра. Притоа, месечниот и годишниот раст се резултат на зголемените кредити на двата сектори, при поизразен придонес на корпоративниот сектор.

 

 

Во јуни, кредитите на домаќинствата забележаа месечно и годишно зголемување од 1,2 отсто и 10,3 отсто, соодветно и изнесуваат 4,27 милијарди евра. Промената кај двете основи се должи на растот на кредитите во денари и во странска валута, со поголем придонес на кредитите во денари.

Кредитите, пак,  на корпоративниот сектор бележат месечен и годишен раст од 2,1 отсто и 16 отсто, соодветно и изнесуваат 4,18 милијарди евра. Притоа, месечната и годишната промена во целост се должат на зголеменото кредитирање во денари, при остварен пад на кредитите во странска валута.

Анализирано според намената на кредитите одобрени на физичките лица, во јуни, потрошувачките и станбените кредити, како најзастапени категории, бележат месечно зголемување од 1,0 отсто и 1,4 отсто, соодветно, при годишен раст од 9,8 отсто и 15,0 отсто, соодветно. Во јуни, автомобилските кредити забележаа намалување од 0,1 отсто и 2,8 отсто на месечна и на годишна основа, соодветно. Овој месец, кредитите одобрени на кредитните картички и негативните салда на тековните сметки остварија месечно зголемување од 0,2 отсто и 3,7 отсто, соодветно, при годишно намалување од 7,6 отсто и 4,2 отсто, соодветно. Кредитите одобрени врз други основи, во јуни, бележат месечен и годишен пад од 1,4 отстои 8,5 отсто, соодветно.

Во моментов нема коментари за веста. Биди прв да коментира...

Остави коментар