Биткоинот стигна до нов рекорд, надмина 69.000 долари

Биткоинот се искачи до нова рекордна вредност бидејќи побарувачката и интересот за новите биткоин ЕТФ фондови во САД, со кои се тргува на берзата, и намалувањето на понудата за токенот поттикнуваат неверојатно враќање на изворната криптовалута.

Најголемото дигитално средство порасна дури за 2,5 отсто, до 69.191 долар во вторникот, пред добивката да се намали. Биткоинот досега годинава се искачи за околу 60 проценти, надминувајќи ги глобалните акции и ширејќи оптимизам низ пазарот за дигитални средства.

Во ироничен пресврт, биткоинот голем дел од своето заживување го должи на регулаторот што долго време се сметаше за непријателски настроен кон криптосферата: Комисијата за хартии од вредност на САД (SEC). Токму SEC на почетокот на јануари ги одобри биткоин-фондовите со кои се тргува преку берза, откако минатата година претрпе пораз во правната битка при обидот да ги одбие. Овој потег ја прошири достапноста на биткоинот до масовниот пазар, помагајќи му на криптосекторот да ја сврти страницата по мечкиниот пазар во 2022 година и низата последователни банкроти, вклучувајќи ја и имплозијата на криптоберзата FTX на Сем Банкмен-Фрид.

Постојаниот прилив на пари се влева во ЕТФ, меѓу чии издавачи има и вистински инвестициски тешкаши, како „Блекрок“ (BlackRock Inc.) и „Фиделити“ (Fidelity Investments). Нето-приливот од повеќе од 7 милијарди долари за помалку од два месеца се поклопува со претстојното намалување на понудата на биткоин - познато како преполовување - што исто така поттикнува биковски сентимент на пазарот.

Bloomberg

„Надминувањето на највисоката вредност на сите времиња, со тековниот моментум на ЕТФ фондовите, како и претстојното преполовување, веројатно ќе го разбуди вистинскиот страв од пропуштање (англ. FOMO - Fear of missing out) меѓу учесниците што моментално го следат пазарот од страна“, вели Стефан фон Хаениш, шеф на тргување во ОСЛ (OSL SG Pte).

Враќањето на биткоинот што започна на почетокот на 2023 година ја подигна вкупната пазарна вредност на дигиталните средства на околу 2,6 трилиони долари. 

Биткоинот го достигна својот претходен врв од 68.991,85 долари на 10 ноември 2021 година, според податоците собрани од „Блумберг“, а поттикнат од монетарниот и фискалниот стимул што владите низ светот ги употребија за да се справат со влијанието на пандемијата на ковид-19. Растот делумно беше поттикнат и од криптопуристите познати по нивната мантра HODL, резултат на правописна грешка на зборот „hold“ (англ. држете) што е усвоена како акроним за „држете се ако ви е мил животот“ (hold on for dear life).