Нов рекорд на биткоинот утрово и најдолга победничка серија од 2021 година

Биткоинот се искачи на рекордно високо ниво благодарение на поддршката за дигиталните средства од новоизбраниот претседател Доналд Трамп, како и поради оптимизмот за претстојното вклучување на „Мајкростратеџи“ (MicroStrategy Inc.) во клучниот мерач на акции во САД. За појаснување, „Мајкростратеџи“ е првата јавна компанија што го усвои биткоинот за свое примарно средство за трезорски резерви.

Промена на вредноста на биткоинот на неделно ниво (дигиталното средства реализира седумнеделен раст, најдолга низа на раст од 2021 година) Bloomberg Mercury

Најголемата виртуелна валута во еден момент утрово се зголеми за повеќе од три отсто на азиските берзи, искачувајќи се до досега невидени 106.493 долари и надминувајќи го со тоа претходниот рекорд од 5 декември. Растот на биткоинот помогна да се зголеми расположението и пошироко на криптопазарот.

Трамп создава пријателска регулаторна заднина за дигиталните средства, поништувајќи ја репресијата наметната од администрацијата на претседателот во заминување Џо Бајден. Републиканецот ја поддржа и идејата за стратегиски национални резерви на биткоин, иако многумина се сомневаат во изводливоста на таквиот предлог.

Во петокот „Насдак глобал“ (Nasdaq Global Indexes) соопшти дека „Мајкростратеџи“ ќе се приклучи на индексот Nasdaq 100, американски технолошки мерач на акции, кој го следат низа инвестициски фондови. 

„Сега, кога ’Мајкростратеџи’ е во Nasdaq, индексните фондови може да ги купат нејзините акции, а тоа ќе ѝ помогне на компанијата да собере повеќе капитал за да купи повеќе биткоини“, рече Шон Мекналти, директор за тргување во „Арбелос маркетс“ (Arbelos Markets).

Првата и најголема криптовалута годинава повеќе од двојно ја зголеми својата вредност, а европското тргување го започна со цена од 104.616 долари. Поттикнати од ваквото расположение, пораснаа и помалите токени, како што се етерот и доџкоинот.

Инаку, биткоинот заокружи седумнеделна победничка серија, што е најдолга таква серија од 2021 година. Но темпото на раст неодамна се олади, што може да биде показател дека можеби доаѓа повлекување, сметаат некои од аналитичарите.

 

Во моментов нема коментари за веста. Биди прв да коментира...

Остави коментар