Шефовите од Волстрит открија од што се плашат

Кревки пазари, заемодавци во сенка(shadow lenders), меѓународни тензии и премногу војни - глобалните банкари кои се собраа во Хонг Конг требаше да разговараат за тоа како се прилагодуваат на „комплексноста“ на финансискиот свет, но наместо тоа, на крајот се задржаа на потенцијалот за големи удари.

„Мојот најголем страв е дека ќе има уште една геополитичка ескалација и пазарен удар“, рече главниот извршен директор на „Дојче Банк“ (Deutsche Bank AG) Кристијан Севинг на Инвестицискиот самит на глобалните финансиски лидери што денеска се одржа во Хонг Конг.

Кристијан Севинг/Фото: Лам Јик/Блумберг

На еден од најголемите собири на лидерите од финансискиот свет од избувнувањето на војната меѓу Израел и Хамас минатиот месец, расположението на сцената беше непријатно додека шефовите на банките и инвестициите разменуваа опсервации и стравови. Настанот, чиј домаќин беше Монетарната управа на Хонг Конг, имаше за цел да ја истражи темата „Живеење со сложеност“.

Ко-главниот инвестициски директор на „Бриџвотер“ (Bridgewater Associates), Боб Принс, предупреди дека пазарите ги потценуваат пресметките за тоа колку долго ќе трае затегнувањето на каматните стапки во САД и Европа во борбата против инфлацијата пред да се постигне рамнотежа. Во меѓувреме, основачот на „Цитадел“, Кен Грифин, рече дека светските лидери веќе ризикуваат повторно да ги запалат цените.

Деглобализацијата е „џиновска дива карта“, рече Грифин, повикувајќи ги слушателите да не се откажуваат од инвестирањето во Кина. Додека економиите имаат корист од мирот и глобализацијата, „не знаеме како изгледа свет кој вклучува деглобализација“, рече Грифин. Тој додаде дека не се знае и „колку системски се зголемува инфлацијата“.

Растот на банкарството во сенка (shadow banking)  - што обично се однесува на позајмување од страна на менаџерите со пари и други небанкарски корпорации и потрошувачи - привлече неколку предупредувања. Приближно половина од глобалните финансиски средства сега се во „секторот во сенка“, процени претседателот на „УБС“ (UBS Group AG), Колм Келехер.

Колм Келехер/Фото: Лам Јик/Блумберг

„Тоа е вистинска причина за загриженост“, рече тој. „Следната криза, кога ќе се случи, ќе биде во тој сектор. Тоа ќе биде доверителска криза“.

Околу 300 директори дојдоа во Хонг Конг како дел од напорите на градот да се придвижи напред по повеќегодишните превирања. Градот се соочи со протести, пандемични заклучувања и на крајот намалувања на работни места, при што десетици илјади висококвалификувани луѓе емигрираа. Истовремено, меѓународните инвеститори и нивните менаџери со пари ги префрлаат средствата од континентална Кина.

Форумот, кој се одржува втора година, е дел од пошироките напори за заживување на статусот на центарот.

„Хонг Конг се враќа во бизнисот“, изјави главниот извршен директор на Хонг Конг, Џон Ли, пред публиката на почетокот на форумот. Но, во исто време, „светот денес е покомплексен и попредизвикувачки од кога било“.

Џон Ли/Фото:Лам Јик/Блумберг

Потенцијалните катастрофи не беа единствената тема, но тие доминираа на форумот.

„Апсолутно мораме да се грижиме за тоа што се случува со дефицитите во САД“, рече извршниот директор на „Голдман Сакс“ (Goldman Sachs Group Inc.) Дејвид Соломон. Тој укажа на растечката големина на долгот на нацијата, како и на потенцијалните трошоци за рефинансирање во различна - помалку ликвидна средина.

Проблемот е што големите нарушувања често се предизвикани од непредвидени сили, рече долгогодишниот лидер на „Морган Стенли“, Џејмс Горман, кој се подготвува да се повлече од функцијата извршен директор на крајот на оваа година.

Џејмс Горман/Лам Јик/Блумберг

Потенцијалните причини може да вклучуваат политика или геополитика, рече тој.

Но, повторно, додаде Горман, „никој во оваа соба не го предвиде Ковид“.

 

 

 

Во моментов нема коментари за веста. Биди прв да коментира...

Остави коментар