.webp){kind=icon}
Потценетите европски банки се подготвени за својата најдобра година досега, за разлика од американските ривали, чии лоши заеми и регулаторните грижи ги стопираа рекордните резултати до крајот на 2023 година.
Индексот KBW Bank, кој ги вклучува 24-те најголеми американски банки, скокна за 30 отсто во ноември и декември - негово најдобро остварување во последните два месеца од 1991 година, според податоците на „Блумберг“.
Годинава се очекува повратот на тој индекс да биде помал од еден процент, според ценовните цели на аналитичарите од 1 јануари, составени од „Блумберг“. Во исто време, европскиот индекс Stoxx 600 Bank се очекува да оствари поврат поголем од 22 отсто, што би било негова втора најдобра година од 2012-та.
Разликата од 21 процентен поен е најголема во очекуваните годишни приноси од најмалку 2005 година, кога „Блумберг“ почна да ги бележи ценовните цели, и доаѓа во време кога американските банки планираат да ги објават резултатите за четвртиот квартал од 2023-та.
Американските банки заостануваат зад европските најмногу во историјата
Bloomberg
Аналитичарите сметаат дека европските банки се потценети и дека годинава ќе ги стигнат американските ривали. Постои растечки консензус дека Банката на Англија (БоЕ) и Европската централна банка (ЕЦБ) ќе ги намалат стапките во вториот квартал, отстранувајќи ја неизвесноста, додека се очекуваат силни приходи - просечната рентабилност на индексот, клучна мерка за профитабилноста, е највисока од 2007 година.
Во САД, „ЏП Морган“ (JPMorgan Chase), „Велс Фарго“ (Wells Fargo) и „Ситигруп“ (Citigroup) забележаа рекордни профити во третиот квартал, но банките се соочуваат со побавен кредитен раст, поголема регулаторна контрола по минатогодишната регионална банкарска криза и стравувања од повисоки долгови и повисоки отписи. И покрај рекордните перформанси на крајот на годината, индексот KBW останува за околу 34 проценти понизок од највисокото ниво во јануари 2022 година.
Се очекува од 46 банки во европскиот индекс Stoxx 600 Bank, 32 годинава да постигнат двоцифрен поврат од акциите, а 24 од нив да надминат 20 проценти. Од друга страна, од 24 банки во индексот KBW, само банката М&Т се очекува да оствари принос од барем 10 проценти.
Нивото на лоши долгови за американските банки би можело да го надмине врвот од ерата на пандемијата
Bloomberg
„Кредитите се непознаница“, вели Кристофер Мекграти, директор на инвестициската банка „Киф, Брајет енд Вудс“ (Keefe, Bruyette & Woods). Додека „намалувањето на каматните стапки барем делумно ја намалува загриженоста“, тој очекува дека повеќе американски долгови ќе останат ненамирени.
Аналитичарите минатата година ги намалија прогнозите за профитот на американските банки за 2024 година за 16 отсто, без значително подобрување дури и откако Фед сигнализираше дека е веројатно намалување на каматите. Истовремено, прогнозите за профитот на европските банки се зголемени за 37 отсто.
Прогнозите за профитот на европските банки се зголемени, додека за американските банки се намалени
Bloomberg
„Годинава сум повнимателен отколку порано“, рече Дејвид Кјаверини, директор за истражување капитал во „Ведбуш“ (Wedbush). „Се чувствувам како да не сум го надминал целосно мамурлакот од стимулот за време на пандемијата и тоа е она што ме прави повнимателен сега“.
Индексот KBW во текот на изминатата деценија оствари просечен поврат од 5,3 проценти годишно, во споредба со годишниот просечен поврат на Stoxx 600 Bank од 0,2 процента.
„ЏП Морган“, „Банката на Америка“ „Велс Фарго“ и „Ситигруп“ треба да ја отворат сезоната на извештаи в петок.
