По најлошата половина година за европскиот пазар за кредити, состојбата почнува да се стабилизира. Европскиот агрегатен еврообврзнички индекс во јули порасна на 4 проценти, што претставува најдобар месец до сега. Тоа на некој начин ги анулираше загубите од јуни, кои изнесуваа слично толкав процент и го ублажи падот од дури 13 отсто во првите шест месеци. Во екот на летото, како што и беше очекувано, беа продадени само неколку од новите корпоративни обврзници но, сите знаци водат кон тоа дека ќе живне активноста по завршување на летото и рекордните 33 денови без издавање корпоративни обврзници.
Растот на каматните стапки во комбинација со одржливото проширување на кредитните распони на корпоративните обврзници, во однос на државните, направи пазарот генерално да не биде поволен, освен за добро познатите високо ликвидни компании. Но, дури и за тие обврзници мораше да се понуди добра цена бидејќи премијата значајно порасна во однос на претходните две години. Може да се заклучи дека деновите на негативни каматни стапки, во кои уживаа некои големи компании, се веќе минато.
Но, неколку зделки од минатата недела покажуваат дека и покрај затишјето за време на летните одмори инвеститорите се многу заинтересирани за некои имиња со атрактивен кредитен распон.
Волво, на пример, продаде петгодишни должнички хартии во вредност од 500 милиони евра, а значајно е да се напомене дека побарувачката за нив беше шест пати поголема од понудата. Шкотската енергетска компанија ССЕ ПЛЦ (SSE PLC) продаде седумгодишни зелени обврзници, вредни 650 милиони евра и привлече девет пати поголем интерес од понудата.
Корпорациите мора да земат предвид два елемента кога се одлучуваат за задолжување на пазарот со обврзници. Прво се каматните стапки. Приносот на германските десетгодишни обврзници ја започна оваа година со негатива од 11 отсто, па порасна на 1,77 проценти. Со моменталните камати од околу 1 отсто значително е помалку страшно да се тестира до каде би можеле да бидат новите разумни нивоа на финансирање. Другиот елемент е премијата на ризик, која што поризичните компании мора да ја понудат во вредност над државните.
На хоризонтот се гледаат и црни облаци, кои носат енергетска криза како што наближува зимата или, пак, неизвесност околу исходот од италијанските парламентарни избори на крајот од септември.
Токму септември ќе претставува вистински тест за апетитите на инвеститорите. Европската централна банка (ЕЦБ) седи на 344 милијарди евра вредни корпоративни долгови и при тоа доспеаните обврзници ги реинвестира на пазарот во вредност од приближно околу 2 милијарди евра на месечно ниво. Но, ЕЦБ веќе не купува нови обврзници со просечна месечна вредност од околу 5 милијарди евра. Тоа излегување од игра на најголемиот купувач инвеститорите би требало да го поздрават.
Доколку остане пригушена нестабилноста на пазарот, втората половина од годинава би требало да донесе значајно поголема активност на пазарот со корпоративни обврзници. Тешко е да се замисли дека трошоците за позајмување повторно ќе се евтини како минатата година, но сега приносите за компаниите се подносливи, а за инвеститорите се доволно интересни за пак да скокнат во инвестициски води. Аналитичарите се надеваат дека септември ќе резултира со голем број нови зделки, што ќе го подобри пристапот до финансирање во Европа.
.webp){kind=icon}
