„Голдман Сакс“ со прогноза - златото може да стигне до 5.400 долари и покрај падот

„Голдман Сакс“ (Goldman Sachs) го задржа оптимистичкиот став за златото и покрај неодамнешната распродажба, прогнозирајќи нов раст до крајот на 2026 година.

Среднорочната перспектива за златото останува стабилна и благородниот метал може да достигне 5.400 долари за унца, наведуваат аналитичарите Лина Томас и Даан Струјвен, повикувајќи се на континуирани купувања од централните банки и уште две намалувања на каматните стапки во САД годинава.

Златото сепак се соочува со „тактички надолни ризици“ на краток рок и може да падне и до 3.800 долари за унца доколку се влоши шокот во снабдувањето со енергија. Сепак, потенцијалот за раст останува значителен доколку војната со Иран поттикне забрзана диверзификација од „традиционалните западни средства“.

Цената на златото падна за 13 отсто од почетокот на војната пред еден месец, откако падот на берзите ги натера инвеститорите да ликвидираат позиции, а пазарот почна да пресметува построга монетарна политика. Но оваа корекција е „претерана односно премногу се нагласува инфлацискиот канал наспроти ефектот врз растот“, велат аналитичарите, додавајќи дека историјата покажува дека грижите за растот на крајот доминираат.

Стравувањата дека некои централни банки би можеле да продаваат злато за да ги поддржат своите валути најверојатно нема да се реализираат. Земјите од Персискиот Залив поверојатно ќе интервенираат преку продажба на американски државни обврзници, бидејќи „вообичаено одржуваат фиксни курсеви врзани за доларот“.

Под претпоставка дека нема дополнителни инвестиции од приватниот сектор, аналитичарите очекуваат волатилноста на цената да се намали во среден рок, што ќе овозможи купувањата од официјалниот сектор повторно да се забрзаат и да изнесуваат во просек околу 60 тони месечно.