Цената на нафтата падна поради тоа што извештајот за индустријата покажа пораст на американските залихи на сурова нафта, а инвеститорите се загрижени поради послабата побарувачка во време на забавување на растот.
„West Texas Intermediate“ (WTI) се повлече под 85 долари за барел. Откако вчера порасна за 0,9 отсто, утрово падна за 0,5 проценти, на 84,86 долари за барел нафта со испорака во декември. „Brent“ нафтата, пак, исто за испорака во декември утрово загуби 0,8 проценти од вредноста и барел се тргува по цена од 92,82 долари.
Bloomberg
Американскиот Институт за нафта извести дека залихите во САД минатата недела се зголемиле за 4,5 милиони барели. Владините податоци ќе бидат објавени денеска. Се зголемува загриженоста околу залихите, вклучувајќи го и дизелот.
Иако нафтата и натаму е на пат да го оствари својот прв месечен раст од мај, бидејќи Организацијата на земји извознички на нафта и нивни сојузници (ОПЕК+), вклучувајќи ја и Москва, се договорија да го намалат производството со цел да ја покачат и стабилизираат цената на нафтата, сепак цените и натаму се значајно ниски во споредба со нивото по започнувањето на руската инвазија врз Украина. Инвеститорите се загрижени поради забавувањето на побарувачката додека централните банки ги подигнуваат каматните стапки за да ја зауздаат инфлацијата. Освен тоа, трговците се насочени на поопширни мерки од Европската Унија (ЕУ) за руските текови почнувајќи до декември.
„Се приближува зимата во услови кога пазарот се подготвува за ембарго на ЕУ против руската нафта“, рече Шон Лим, аналитичар за нафта и гас во „RHB Investment Bank Bhd“. „Но, ако мене ме прашувате дали цената на нафтата ќе скокне како одговор на санкциите од декември, сметам дека можеби нема да се случи тоа, бидејќи Русија веќе ги пренасочи своите количини на други пазари“, додава Лим.
Со цел да помогне во ставањето под контрола на цената на нафтата и бензините, администрацијата на американскиот претседател Џо Бајден, ослободи милион барели сурова нафта од националните стратешки резерви. Вчера министерот за енергетика на Саудиска Арабија ги критикуваше главните увозници поради обид да ја скротат цената преку продажба на своите залихи, додека ја бранеше одлуката на ОПЕК+ за намалување на испораките.
.webp){kind=icon}
Во моментов нема коментари за веста. Биди прв да коментира...