text size
Нафтата поевтини бидејќи слабите економски податоци од Кина поттикнуваат загриженост за побарувачката на енергија. Но оваа суровина и натаму е на пат да го оствари својот прв месечен позитивен резултат од јули, како резултат на планираните кратења на испораките од страна на Организацијата на земјите извознички на нафта и нивните сојузници (ОПЕК+).
Фјучерсите на ВТИ (West Texas Intermediate - WTI) утрово паднаа и се движат кон нивото од 87 долари за барел. Тоа се случи откако кинеската влада објави пад на производствените и услужните активности во октомври. Националната нулта ковид-политика на Кина и континуираниот пад на пазарот на недвижности силно ја оптоварија кинеската економија оваа година.
И ВТИ и нафтата брент за испорака во декември загубија по 0,8 проценти од вредноста, така што сега ВТИ се тргува по цена од 87,23 долари за барел, додека нафтата брент чини 95,03 долари за барел.
Суровата нафта и натаму е во плус од околу 10 отсто за овој месец, а причина за тоа е одлуката на ОПЕК+ да го намали производството на нафта за дури два милиона барела дневно. Ограничувањето стапува во сила од утре, што претставува почеток на неизвесен период за испораката на нафта токму кога настапува зимата. Дополнително, Европската Унија (ЕУ) од декември спроведува санкции за руските текови на нафта.
Bloomberg Mercury
„Пазарот е подготвен да продолжи да расте поради тоа што санкциите кон Русија би требало да стапат во сила од 5 декември, а ОПЕК+ веќе од утре отфрла од игра по два милиона барела нафта дневно“, рече Џејмс Вислер, директор на брокерската куќа „Ванир глобал маркетс“ (Vanir Global Markets Pte) во Сингапур.
Нафтата загуби околу една четвртина од својата вредност во периодот од јуни досега, главно поради загриженоста од забавување на светската економија и строгите монетарни политики што претставуваат закана за намалување на побарувачката.
Инвеститорите неделава ќе ги следат одлуките на централните банки во врска со каматните стапки, вклучувајќи ја и одлуката на американските Федерални резерви (ФЕД). Доларот се повлече од рекордно високото ниво, иако ФЕД продолжи да ги зголемува каматните стапки за да ја скроти инфлацијата. Тоа помага на тој начин што суровата нафта ја прави поатрактивна за поголемиот дел купувачи од странство.
.webp){kind=icon}
