.webp){kind=icon}
Цената на нафтата падна откако Кина сигнализира дека нема да попушти во својот став за политиката на нулта ковид, бидејќи бројот на инфицирани случаи достигна највисоко ниво во последните шест месеци. Тоа ги намали прогнозите за побарувачката на најголемиот светски увозник.
ВТИ (West Texas Intermediate-WTI) потона кон нивото од 91 долар за барел, откако минатата недела порасна за повеќе од пет проценти. Добивката тогаш беше предизвикана од можностите за потенцијално заобиколување и олабавување на кинеската здравствена стратегија, како и од слабеењето на американскиот долар. Но таквите надежи се изгубија во текот на викендот, кога надлежните од Националната здравствена комисија рекоа дека Кина „непоколебливо“ ќе се придржува до моменталниот начин на контрола на вирусот.
Нафтата ВТИ за испорака во декември загуби 1,5 процент од вредноста и сега барел чини 91,19 долар, додека нафтата брент за испорака во јануари падна за 1,3 процент, на 97,32 долари за барел.
Нафтата беше под удар во последните неколку недели, бидејќи инвеститорите настојуваа да ги проценат изгледите за побарувачката во Кина поради влијанието од претстојните санкции за руските текови на нафта од страна на ЕУ, како и поради одлуката на Организацијата на земји извознички на нафта и нивни сојузници (ОПЕК+) да го намали производството од овој месец, и тоа за два милиона барела дневно.
Растечката загриженост поради глобалното забавување и построгите монетарни политики, исто така, ги поттикнаа цените. Сепак, рафинериските цени во САД остануваат за над 20 проценти поголеми од пред една година.
„Денеска сѐ се врти околу Кина, за тоа дали ќе ги ублажи ограничувањата поврзани со вирусот и дали тоа ќе влијае на цените на акциите“, рече Даниел Хинс, виш стратег за стока во Банкарската групација на Австралија и Нов Зеланд (Australia & New Zealand Banking Group Ltd.). „Освен тоа, на страната на понудата е ОПЕК, организацијата што ги намалува испораките од овој месец, како и европските санкции што ќе почнат да се применуваат набргу“, додава Хинс.
Кинеската политика на нулта ковид се потпира на комбинацијата од карантин и масовно тестирање за да се искорени инфекцијата, а нејзиното спроведување ја оптоварува националната економија и претставува трајна пречка на светскиот пазар на сурова нафта. Во целата земја вчера се пријавени повеќе од 5.400 нови случаи, што е за 27 проценти повеќе отколку претходниот ден, а истовремено тоа е највисока бројка од почетокот на мај.
„Постои разочарување по потврдата дека Кина ќе остане доследна на својата политика на нулта ковид. Можеме да видиме натамошен притисок надолу поттикнат од широката макрослика. Меѓутоа, на среден и долг рок, очекувањата уште се конструктивни, а се очекува и заострување на пазарот во текот на 2023 година“, рече Ворен Петерсон, раководител за стоковни стратегии во „ИНГ груп НВ“ (ING Groep NV).
