Јапонија предупредува дека глобалната конкуренција за течен природен гас (ЛНГ) ќе се интензивира во следните три години поради недоволното инвестирање во снабдувањето.
Долгорочните договори за ЛНГ што започнуваат пред 2026 година се распродадени, според истражувањето во јапонските компании, спроведено од страна на Министерството за трговија на земјата и објавено во понеделникот. Овие типови договори се важни за клиентите бидејќи нудат стабилни цени и сигурна понуда за подолг период.
Земјите низ светот се борат да обезбедат снабдување со овој енергент за електроцентрали и греење од големите извозници како Катар и САД, но малку нови резерви ќе пристигнат пред 2026 година. Во меѓувреме, Европа е во трка да го замени рускиот гас со ЛНГ, што дополнително ги влошува глобалните недостатоци.
Bloomberg Mercury
Ова значи дека увозниците ќе бидат принудени повеќе да зависат од нестабилниот и скап спот-пазар (на самото место), каде што тековно се тргува за речиси трипати повеќе од долгорочните договори. Според Меѓународната групација на увозници на течен природен гас, околу 30 проценти од сите испораки на ЛНГ минатата година биле преку пазарот на самото место.
Претставници на јапонското министерство и директори на енергетски компании се состанаа за да разговараат за плановите за набавка на ЛНГ. Оваа година Јапонија е подготвена да стане најголемиот светски увозник на ЛНГ, што, според земјата, е најдобар избор на гориво за производство на електрична енергија.
Недостигот од инвестиции во проекти за извоз на ЛНГ значи дека понудата ќе биде многу ограничена со години, се наведува во документот на јапонското министерство за трговија. Доколку руските текови на гас кон Европа бидат целосно прекинати, светот може да доживее недостиг од 7,6 милиони тони ЛНГ во јануари 2025 година, што е еквивалентно на еден месец увоз во Јапонија, се наведува во документот.
Јапонија презеде чекори за зголемување на енергетската безбедност, дозволувајќи ѝ на Владата да купува ЛНГ на самото место во случај компаниите да не можат да го сторат тоа.
.webp){kind=icon}
