Нафтата повторно падна бидејќи Европската унија размислува за горна ценовна граница на руската сурова нафта, повисока од очекуваната, а знаците за предизвици со побарувачката се интензивираа по рекордните случаи на Ковид-19 во Кина и ризикот од рецесија во САД.
West Texas Intermediate (WTI) падна под 78 долари за барел, откако загуби речиси четири отсто во претходната сесија. Претставниците на ЕУ дебатираа за поставување на плафон за рускиот извоз по морски пат од 65 до 70 долари за барел. Тоа е значително повеќе од очекуваното кога Г7 за првпат ја предложи идејата како начин да се казни Москва за војната во Украина. Амбасадорите закажаа дополнителни разговори вo четврток поради несогласувања околу деталите.
Во САД, економистите известија дека со порастот на каматните стапки можноста за рецесија во текот на следната година се зголемила на речиси 50 отсто. Официјалните лица во Кина прават агресивни напори да го запрат ширењето на пандемијата, наредувајќи заклучувања и ограничувања на движењето бидејќи дневниот број на случаи на вирусот се искачи на скоро 30.000.
Bloomberg
Нафтата падна овој месец, повлекувајќи ги октомвриските добивки по одлуката на Организацијата на земјите извознички на нафта и нејзините сојузници (ОПЕК+) да го намалат производството. Додека планот за ограничување на цената, кој треба да ја надополни забраната на ЕУ за поморски текови на руската сурова нафта, што стапува на сила од декември, се сметаше за потенцијална поддршка за нафтата доколку резултира со помало производство, високата граница може да изврши само минимално влијание на трговијата.
„Можна е согласност со бројка што не е премногу далеку од она за што моментално се тргува со типот Урал, што го прави целиот потег уште потривијален“, вели Вандана Хари, основач на Vanda Insights, мислејќи на руската сурова нафта која се испорачува од западот на земјата. „Без ограничувањето, руската сурова нафта и онака ќе продолжи да се тргува со значителни попусти“.
Од „Голдман Сакс“ (Goldman Sachs) посочуваат дека моментално разгледуваниот повисок плафон на цените може да го намали ризикот од одмазда на Москва, иако изразија сомнеж во можноста за спроведување на тој механизам.
WTI за испорака во јануари се тргуваше за 0,6 отсто пониско за 77,50 долари за барел на Њујоршката берза во 6:09 часот во Лондон. Брент за испорака во јануари падна за 0,6 отсто на 84,88 долари за барел на ICE Futures Europe берзата.
Како дополнување на помеките изгледи, залихите на бензин во САД минатата недела се зголемија за 3,06 милиони барели, што е најголем пораст од јули, покажуваат податоците на американската влада. Побарувачката падна најмногу во речиси два месеца пред паузата за Денот на благодарноста.
.webp){kind=icon}
