.webp){kind=icon}
Нафтата се движи кон загуба веќе трета недела по ред, бидејќи Европската Унија (ЕУ) одредува горна граница на цената на руската сурова нафта поголема од очекуваното, а загриженоста поради забавувањето ги загрози изгледите за побарувачката.
Нафтата ВТИ за испорака во јануари порасна за 0,7 проценти и се тргува по цена од 78,46 долари за барел, додека нафтата брент исто така за испорака во јануари загуби 0,5 проценти од вредноста и се тргува на ниво од 85,72 долари за барел. Во САД вчера не се тргуваше со нафта поради празникот Ден на благодарноста.
Нафтата брент се тргуваше под 86 долари за барел, ставајќи ја глобалната референтна вредност на курс за пад од повеќе од два процента оваа недела. Европските дипломати и натаму се зафатени со разговорите за тоа колку би требало да биде строга горната ценовна граница, истакнувајќи ги несогласувањата меѓу државите членки. Преговорите би можеле да продолжат денеска, но може и да се одложат за понатаму.
Bloomberg Mercury
Знаците за предизвик на побарувачката се трупаат. Во Кина, најголемиот светски увозник на нафта, дневната инфекција со ковид неделава достигна рекорд, што ги принуди надлежните да ги зајакнат мерките на ограничувања. Институтот за меѓународни финансии, пак, прогнозира дека светската економија следната година ќе биде еднакво слаба како што беше во 2009 година, по финансиската криза, поради оддолжувањето на војната во Украина.
Суровата нафта и овој месец падна, поништувајќи ги добивките остварени во текот на октомври, откако Организацијата на земји извознички на нафта и нивните сојузници го намалија производството.
„Нафтата се бори со факторите за пад од последните неколку сесии поради рецесиските стравови и порастот на ковид-случаи во Кина. Ограничувањето на цените на руската нафта меѓу 65 и 70 долари нема да има големо влијание, бидејќи веќе се тргува на тоа ниво“, рече Равиндра Рао, раководител за истражувања на стоки во „Котак секјуритис“ (Kotak Securities Ltd.) во Мумбај.
Планот за ограничување на цената е дел од одговорот на ЕУ и Г7 за да се казни претседателот на Русија, Владимир Путин, за инвазијата врз Украина преку намалување на приходите на Москва, додека истовремено другите држави дозволуваат да се продолжи увозот. „Воведувањето ограничување од страна на западните земји со голема веројатност ќе има ефект на енергетскиот пазар“, рече Путин.
