Полска и Балтикот децидни дека 65 долари за руска нафта се премногу

Дипломатите на Европската унија (ЕУ) ги прекинаа разговорите за ограничување на цената на руската нафта, бидејќи Полска и балтичките земји се спротивставија на предлогот, кој го сметаат за премногу дарежлив кон Москва.

Преговарачите очекуваа да биде постигнат договор во петокот вечерта, но позициите останаа цврсти и разговорите се одложени до понеделник, посочуваат упатени извори.  

Блокот се најде во судир околу тоа колку строга треба да биде границата на цените што ја предлага Групата седум. Полска и балтичките земји се огорчени од предлогот за ограничување на цената на руската нафта на 65 долари за барел, бидејќи нивото е над стапките по кои сега продава Москва. Полска бара дополнителни санкции, механизам за ревизија и цена под пазарното ниво, посочува високиот дипломат.

Со оглед на тоа што Полска и балтичките земји го отфрлија предлогот, спорот открива фундаментална напнатост во срцето на идејата за ограничување на цената. Земјите се принудени да избираат помеѓу два речиси невозможни приоритета: обидот да се задушат приходите на Русија и избегнување на потенцијално болни скокови на цената на нафтата, што може да ѝ наштети на светската економија.

Руската нафта веќе се тргува по цена под предложената граница / Bloomberg

„Ако го поставите плафонот на цените премногу високо, тоа навистина нема ефект“, рече потпретседателот на Европската комисија, Валдис Домбровскис, во интервју за телевизијата Bloomberg. „Нафтата е најголемиот извор на приходи за рускиот буџет, затоа е многу важно тоа да се направи правилно за навистина да има влијание врз способноста на Русија да ја финансира војната“, додава тој.

Земјите на транспортните рути, како Грција, се залагаат за повисоко ниво за да се помогне трговскиот тек.

Преговорите беа напорни бидејќи плафонот од 65 долари е над цените што Русија веќе ги прифаќа за својата сурова нафта - ниво што е далеку намалено во однос на светските стандарди. Кремљ соопшти дека ќе одбие да продава нафта на секој што ќе стави потпис за спроведување на ограничувањата - но се чини дека во четвртокот навести дека може да го омекне тој став.

Крајниот рок се приближува: санкциите на ЕУ за руската нафта треба да стапат на сила на 5. декември, а нарушувањето на пазарот веројатно ќе биде поголемо ако не се воведе ограничување на цената.

Санкциите на ЕУ ќе оневозможат пристап до осигурување и услуги за секој брод што превезува руска нафта. Ограничувањето овозможува пристап до таквите услуги, но само ако нафтата се купи под одредено ценовно ниво. САД претходно годинава предложија ограничувања на цените како алтернатива на санкциите на ЕУ кои беа толку строги што предизвикаа ризик за прекинување на дел од производството.

Bloomberg

САД тврдат дека скокот на цените предизвикан од санкциите на ЕУ на крајот може да му биде од корист на Путин - но и да биде катастрофален за светската економија.

Цените на нафтата паднаа во последните денови, делумно поради знаците дека договорот може да го одржи протокот на руска нафта, намалувајќи го притисокот врз светските пазари.

Американските власти одбија да ги коментираат разговорите во петокот.