.webp){kind=icon}
Нафтата се движи кон својата најголема неделна добивка во последните два месеци бидејќи Кина ја ублажи контролата врз вирусот, Вашингтон размислува за пауза во продажбата од стратегиските резерви, а послабиот долар ја зголеми привлечноста на стоката изразена во американската валута.
ВТИ (West Texas Intermediate-WTI) за испорака во јануари утрово доживеа само мала промена и се продава по цена од 81,31 долар за барел, но на неделно ниво цената е зголемена за повеќе од шест проценти. Нафтата брент, пак, за испорака во февруари се искачи за 0,4 проценти и се тргува по цена од 87,18 долари за барел.
ВТИ се задржа над нивото од 81 долар по низата од четиридневна добивка. Порастот на цените доаѓа во пресрет на клучниот состанок на Организацијата на земји извознички на нафта и нивните сојузници (ОПЕК+), кој треба да се одржи викендов, како и настојувањата на Европската Унија (ЕУ) во последен момент да се договори за горната граница на цената на руската нафта.
Кина, земјата што е најголем увозник на нафта во светот, дозволи во Пекинг некои луѓе инфицирани со ковид да се изолираат дома, што е уште едно ублажување на нивната политика на нулта ковид. Освен тоа, гувернерот на Народната банка на Кина, Ји Ганг, рече дека централната банка сега е фокусирана на економскиот раст, што помага во прогнозите за потрошувачката на енергија.
Bloomberg Mercury
Нафтата оваа недела доживеа нагло заздравување откако во понеделникот го достигна најниското ниво од 2021 година, а изгледите за побарувачката се подобрија поради намалувањето на кинеската политика на нулта ковид по протестите. Исто така, постојат и јасни знаци од надлежните од американските Федерални резерви (ФЕД) дека темпото на зголемување на каматните стапки ќе биде забавено, бидејќи показателот на потрошувачките цени во САД е под очекувањата.
„Кина се движи кон повторно отворање малку побрзо отколку што очекувавме по немирите што ги видовме. Ако Кина тргне следната година, тоа навистина ќе ги помести работите“, рече Нил Бевериџ, виш нафтен аналитичар во „Стенфорд Бернштејн“ (Sanford C. Bernsteinu) во гостувањето на Блумберг ТВ во Хонгконг.
Зајакнување на добрите изгледи предизвикаа и повиците од администрацијата на Бајден да се прекине продажбата од стратегиските резерви на нафта и да овозможи повторно полнење на резервите во земјата за итни случаи. На пазарот на валути, индексот на Блумберг што ја покажува вредноста на доларот го продолжи повлекувањето, што претставува ветер во грб за суровата нафта.
Претставниците на ОПЕК+ ќе се состанат виртуелно овој викенд за да одлучат за резервите, а постојат очекувања дека членките ќе го задржат производството стабилно. Трговците, исто така, очекуваат дополнителни детали во врска со ограничувањата на цената на руската нафта. ЕУ сега се залага за 60 долари.
„Таа потенцијална граница на цената од 60 долари за барел уште е над моменталното ценовно ниво што Русија го добива за својата сурова нафта. Ако биде договорено ова ниво, тоа во овој момент ќе има мало влијание врз руските приходи од нафтата“, вели Ворен Питерсон, раководител за стоковни стратегии во „ИНГ груп“ (ING Groep NV) во Сингапур.
Трошоците за достава на сурова нафта веројатно растат бидејќи сè повеќе сопственици на танкери избегнуваат да тргуваат веќе неколку дена пред стапувањето во сила на строгите санкции од ЕУ. Сопствениците што уште имаат желба да товарат руска сурова нафта се обидуваат да наплатат повеќе заради ризикот.
