.webp){kind=icon}
Цената на нафтата напредуваше паралелно со напредокот на Кина во повторното отворање кога станува збор за политиката на нулта ковид. Организацијата на земји извознички на нафта и нивните сојузнички (ОПЕК+) го задржа производството стабилно, а санкциите на руската сурова нафта стапија во сила.
Нафтата ВТИ (West Texas Intermediate - WTI) за испорака во јануари утрово доби еден отсто на својата цена и се искачи на 80,80 долари за барел, иако претходно достигна и цена од 81,84 долар. И нафтата брент за испорака во февруари доби еден отсто на вредноста и сега се тргува на ниво од 86,40 долари за барел.
Со ваквиот ценовен напредок, ВТИ се надоврза на минатонеделниот раст од речиси пет отсто, бидејќи клучните урбани центри, вклучувајќи го и Шангај, најавија натамошно ублажување на ковид-ограничувањата за викендот.
ОПЕК+, вклучувајќи ја и Русија, вчера се согласи да го задржи производството на сегашното ниво, со што во извесна мера ги контролира пазарот и цената на нафтата. За да се казни дополнително Москва за инвазијата во Украина, Европската Унија (ЕУ) во соработка со Г7 се согласи да наметне горна ценовна граница за руската нафта на ниво од 60 долари за барел, а од денеска се забранува поголемиот увоз по морски пат. Иницијативата има цел финансиски да ја казни Русија, а истовремено да го задржи дотокот на нафта од земјата во други држави. Заменикот на рускиот премиер, Александар Новак, повторно ги отфрли ограничувањата, велејќи дека земјата е подготвена да го намали производството ако е потребно.
Движење на цената на нафтата ВТИ / Bloomberg Mercury
Договорот на ОПЕК+ следува по вчерашниот состанок, кој се одржа преку интернет, наместо со физичко присуство во Виена, како што беше планирано. Заедничкиот министерски надзорен одбор повторно ќе се состане на 1 февруари. Поголемиот дел аналитичари не очекуваа промена во политиката на количествата за испорака на нафта. Договорот за ограничување на цената за руската сурова нафта се подготвуваше со месеци, бидејќи САД изразија загриженост дека забраната на ЕУ за руската нафта и поврзаните услуги за осигурување и финансирање ќе доведат до штетен скок на цената. Сепак, сегашното договорено ниво е за околу 10 долари над цената на рускиот нафтен бренд „Урал“, што сугерира дека влијанието на тековите може да биде ограничено.
