Потрошувачката на кафе ќе расте скромно во следните неколку години

Глобалната потрошувачка на кафе веројатно ќе расте од еден до два отсто годишно до крајот на деценијата, покажува извештајот на директорката на Меѓународната организација за кафе, Ванусиа Ногуеира, која проценува дека ќе бидат потребни уште околу 25 милиони вреќи кафе од 60 килограми во следните осум години.

„Сега сме поконзервативни за краткорочни проекции“, рече Ногуеира во текот на конференцијата што се одржа во виетнамското здружение за кафе и какао, мислејќи на сите случувања со кои се соочува светот, вклучувајќи ги и високата инфлација во Европа и војната во Украина. „Претходните прогнози на здружението за долгорочен раст на потрошувачката, во просек за 3,3 отсто на годишно ниво, беа премногу оптимистични“, додаде таа.

„Глобалниот пазар ќе постигне рамнотежа во понудата и побарувачката во следните две-три години, наместо сегашниот дефицит“, рече Ногуеира во интервју за „Блумберг“.

Движење на цената на робуста и арабика во текот на оваа година / Bloomberg Mercury

 

„На светот му требаат повеќе зрна арабика и робуста, но зголемувањето на производството на робустата и побарувачката ќе бидат поголеми“, рече таа. Традиционалните производители на сортата арабика се обидуваат да одгледуваат повеќе робуста во услови на глобално затоплување, додека пржилниците настојуваат да ја додаваат робустата во својата мешавина.

„Ако имате робуста со поголем квалитет, потрошувачите нема да почувствуваат голема разлика во мешавината“, вели таа. „Многу пазари бараат фина робуста“, рече Ногуеира.

„Виетнам ја изработува својата домашна задача кога станува збор за проширување на производството на висококвалитетна робуста, и тоа многу добро“, вели таа.

Здружението не гледа дека виетнамската доминација во светот за извоз на робуста ќе биде оштетена со зголемувањето на производството на конилон во Бразил (понов бразилски вид на робуста), бидејќи дополнителното производство ќе оди за испораките во потоплите делови во таа јужноамериканска земја. „Производителите мора да ја поттикнат домашната потрошувачка заради подобри цени и корист за својата економија“, вели Ногуеира.

„Во Виетнам домашното производство на кафе ќе се зголемува за пет-десет проценти во следните години, од сегашните 300.000 тони, што вклучува 170.000 тони што се користат за производство на инстант-кафе“, рече До Ха Нам, потпретседател на тамошното здружение за кафе, во текот на истата конференција.

Нам, кој е и претседател на најголемиот национален снабдувач „Интимекс груп“ (Intimex Group), предвидува дека испораките од Виетнам ќе паднат во 2022 и 2023 година поради помалото производство и безначајните резерви од претходната сезона.

Меѓународната организација за кафе е меѓувладино здружение на земјите извознички и увознички на кафе, кои претставуваат повеќе од 90 проценти од светското производство и над 60 отсто од потрошувачката, покажуваат податоците на интернет-страницата на ова здружение.