Цената на нафтата утрово порасна, откако претходно падна за девет проценти во текот на последните две сесии на тргување, а загриженоста околу побарувачката и натаму виси над пазарот.
Нафтата ВТИ за испорака во февруари утрово порасна за еден отсто, искачувајќи се на 73,57 долари за барел, откако во текот на вчерашното тргување затвори дури за 5,3 проценти пониско. Нафтата брент, пак, за испорака во март доби 0,9 проценти на вредноста и сега барел чини 78,54 долари.
ВТИ-фјучерсите се искачија кон нивото од 74 долари за барел, откако го прекинаа најголемиот дводневен пад од март. Растечкиот број случаи на ковид во Кина ги замаглуваат краткорочните изгледи за побарувачката, засенувајќи го оптимизмот дека потрошувачката на стока од страна на најголемиот светски увозник на нафта на крајот конечно ќе заздрави.
Мрачниот почеток на годината дополнително е влошен со слабата ликвидност, поради што нафтените фјучерси се изложени на диви промени на цените. Инвеститорите ги одмеруваат внимателно и коментарите на банкарите од состанокот на ФЕД минатиот месец, кои ја потврдија својата одлучност да ја намалат инфлацијата без премногу да ја забават економијата.
„Знаците на предупредување за глобална рецесија, слабото заздравување на Кина со порастот на случаи инфицирани со ковид и ослабеното расположение кон ризик се катализаторите што ја држат цената на нафтата под контрола“, рече Јан Ронг Јап, извршен стратег во „ИГ Азија“ (IG Asia Pte).
Американскиот институт за нафта, кој ја финансира индустријата, извести дека комерцијалните резерви на сурова нафта во САД минатата недела се зголемиле за 3,3 милиони барели. Пораснале и резервите на бензини, но се намалиле резервите на дестилати, категорија што го вклучува и дизелот.
.webp){kind=icon}
