Нафтата напредуваше втора сесија по ред, но и натаму останува на пат за голема неделна загуба, бидејќи загриженоста за побарувачката продолжува да се надвиснува над пазарот.
ВТИ за испорака во февруари порасна за 0,8 отсто, на 74,22 долари за барел, додека нафтата брент за испорака во март ја зголеми својата вредност за 0,7 проценти и се тргува по цена од 79,22 долари.
Вредноста на фјучерсите на ВТИ утрово се зголеми над 74 долари за барел, намалувајќи го неделниот пад на околу седум проценти. Саудиска Арабија ги намали цените на суровата нафта што ја продава во Азија и Европа за февруари, сигнализирајќи загриженост за краткорочните изгледи. Кина се бори со напливот на случаи со ковид откако беа укинати ограничувањата.
Движење на цената на нафтата ВТИ на неделно ниво / Bloomberg Mercury
„Пошироките финансиски пазари ја започнаа 2023 година во мрачно расположение поради глобалната економија и нафтата е зафатена од тоа“, рече Вандана Хари, основач на „Ванда инсајтс“ (Vanda Insights).
Слабиот почеток на годината се влоши со недостигот од ликвидност, оставајќи ги фјучерсите на нафтата склони кон диви промени на цените. Меѓународниот монетарен фонд (ММФ) оваа недела предупреди дека една третина од глобалната економија би можела да влезе во рецесија во 2023 година, додека претседателот на ФЕД Сент Луис, Џејмс Булард, сигнализира дека каматните стапки во САД сè уште не се доволно рестриктивни.
Инвеститорите ги следат податоците за платните списоци во САД, податоци што треба да бидат објавени во текот на денешниот ден. Тие треба да дадат насоки за патот по кој ќе продолжи монетарната политика.
Извозот на сурова нафта и рафинирани производи од САД порасна за 1,33 милион барели минатата недела, според владините податоци. Комерцијалните резерви на сурова нафта се зголемија за 1,69 милион барели, додека резервите на бензин паднаа.
.webp){kind=icon}
Во моментов нема коментари за веста. Биди прв да коментира...