.webp){kind=icon}
Цената на нафтата порасна бидејќи трговците гледаат заживување на кинеската побарувачка оваа година, откако податоците покажаа дека економијата во минатиот квартал помина подобро од очекуваното.
Нафтата брент за испорака во март додаде 0,3 проценти на својата вредност и утрово барел чини 84,71 долари, додека ВТИ за испорака во февруари се тргува по цена од 79,33 долари.
Глобалната референтна вредност на нафтата брент порасна до 85 долари за барел, откако вчера се намали за еден отсто. Податоците од Пекинг покажаа дека кинеската економија порасна повеќе од очекуваното во четвртиот квартал, бидејќи брзо завршија ограничувањата на вирусот. Се чини дека тоа ќе ги зајакне очекувањата на трговците за поголема потрошувачка на енергија оваа година.
Движење на цената на ВТИ и нафтата брент / Bloomberg Mercury
Во пресрет на објавата на податоци, „Голдман Сакс“ (Goldman Sachs Group Inc) го повтори својот аргумент за повисоки цени на суровата нафта, тврдејќи дека западните економии ќе избегнат рецесија, што ќе ја помогне потрошувачката, исто како што се подобрува кинеската побарувачка и се намалува руската понуда.
„Пазарите на стоки сега ги одредуваат цените во рецесија, за која не веруваме дека ќе се материјализира“, се вели во вчерашната белешка на банката.
Суровата нафта имаше тежок почеток на годината, потонувајќи во првата недела поради загриженоста за глобалното забавување, а потоа се врати „во нормала“. Освен од Кина, нафтата најде поддршка и во растечките очекувања дека ФЕД се ближи кон крајот на својата агресивна серија на зголемувања на каматните стапки и слабеењето на доларот.
„Подобрите од очекуваните податоци во Кина би можеле да ги поддржат цените, бидејќи фокусот моментално е на кинеската побарувачка“, рече Равиндра Рао, шеф за истражување на стоки во „Котак“ (Kotak Securities Ltd) во Мумбаи, потенцирајќи го крајот на ограничувањата на вирусот.
Во текот на денов Организацијата на земји извознички на нафта (ОПЕК) треба да ја објави својата месечна анализа на глобалниот пазар. Кон крајот на минатата година, пошироката 23-члена група на ОПЕК и нивните сојузници (ОПЕК+) се согласи колективно да го намали снабдувањето за 2 милиони барели дневно од ноември, а потоа да го одржи стабилно до 2023 година.
Потенцијалното влијание на повторното појавување на Кина на пазарот е клучна тема во неодамнешните процени. Меѓу нив, ИНГ (ING Groep NV) овој месец рече дека нафтата брент би можела да чини во просек повеќе од 100 долари за барел оваа година, бидејќи земјата ги укинува ограничувањата за ковид, додека менаџерот на хеџ-фондот, Пјер Андуранд, рече дека нафтата може да надмине и 140 долари во 2023 година.
