Германската влада сака да го ограничи увозот на руски течен природен гас, зголемувајќи ги напорите да ја намали зависноста на земјата за снабдување со енергија, се вели во владиниот документ што „Блумберг“ го доби на увид.
„Федералната влада не ја поддржува набавката на руски течен природен гас. Федералната влада ги информира компаниите дека ќе преземе соодветни мерки за да го елиминира купувањето руски течен природен гас доколку е можно“, напиша заменик-министерот за енергетика Патрик Грајхен, како одговор на сет прашања поднесени од конзервативните опозициски пратеници.
Портпаролот на Министерството за економија, кое исто така е одговорно за енергетиката, одби да го коментира документот и какви конкретни мерки презема владата.
Протоците на гас во Европа од Русија паднаа на историски најниско ниво по инвазијата на Кремљ врз Украина минатата година. За да се надомести недостигот, се зголемија испораките на течен природен гас од целиот свет, вклучувајќи и од Русија, и не се предмет на никакви санкции од ЕУ.
Само Обединетото Кралство и неколку помали држави формално го забранија увозот на течниот природен гас од Русија, при што многу од тие товари беа пренасочени кон пристаништата на други места. Земјите како Франција, Белгија, Холандија и Шпанија сè уште прифаќаат пратки на руски течен природен гас, кој сега сочинува околу шест отсто од увозот на гас на континентот, според германската лоби-група „Цукунфт гас“.
„Германската влада е свесна дека рускиот течен природен гас стигнува до увозните терминали во соседните земји“, напиша Грајхен. Сепак, нема информации за транспортот и потрошувачката на горивото во Европа и затоа не може да се процени колку од него е складирано во моментов. Компаниите во иднина ќе имаат обврска да ја информираат Комисијата за потеклото на набавката на природен гас доколку нивниот волумен е поголем од пет терават-часа, се наведува во документот.
.webp){kind=icon}
