.webp){kind=icon}
Побарувачката на нафта во Кина, најголемиот увозник во светот, се засили со излегувањето од рестрикциите што беа дел од политиката на нулта ковид, соопшти државната енергетска компанија на Кувајт.
„Постои зголемена побарувачка што е акумулирана поради пандемијата. Сега, со отворањето, гледаме зголемување на побарувачката што е одржлива. Ова не е импулсивно отскокнување“, изјави шеикот Наваф Ал-Сабах, главен извршен директор на „Кувајт петролеум“ (Kuwait Petroleum Corp), за ТВ Блумберг во Бангалор, Индија.
Кувајт е четвртиот најголем производител на сурова нафта во Организацијата на земји извознички на нафта и извезува околу два милиона барела дневно, или два отсто од глобалната понуда. Кина е нејзиниот најголем клиент.
Трговците со нафта внимателно ја следат Кина, велејќи дека темпото на нејзиното закрепнување ќе биде единствениот најголем фактор што ќе ги одреди движењата на цените на енергијата оваа година.
Нафтата брент се намали речиси за седум проценти од крајот на декември, на нешто повеќе од 80 долари за барел, главно затоа што податоците од Кина сугерираат дека економското закрепнување е стабилно. Сепак, „Голдман Сакс“ (Goldman Sachs Group Inc) и „Морган Стенли“ (Morgan Stanley) се меѓу аналитичките куќи што предвидуваат дека цената на нафтата ќе се искачи над 100 долари во втората половина од годината.
