Нафтата порасна од најниското затворање во последните 15 месеци по тридневната криза што се прелеа од американската банкарска криза. Фјучерсите на ВТИ се тргуваа близу 68 долари за барел откако паднаа за околу 12 проценти во текот на претходните три сесии.
Конкретно, утрово ВТИ порасна за 0,7 проценти и барел се тргува по цена од 68,11 долари, додека вредноста на нафтата брент се зголеми за 0,8 отсто, со што барел сега чини 74,27 долари.
Движење на цената на ВТИ и нафтата брент / Bloomberg Mercury
Превирањата предизвикани од колапсот на банката „Силикон валеј“ (СВБ) и новите пресврти во „Кредит Суис“ (Credit Suisse Group AG) одекнаа низ глобалните средства со сè побрзо темпо на продажба на нафтата, додека фирмите се обидуваа да ја ограничат својата изложеност на пазарот на опции.
„Се чини дека одиме по тенок мраз во моментов. Кревката ризична средина сè уште се обидува да се стабилизира од последиците од СВБ. Изгледа дека засега има недостиг од катализатори за зголемување на цената на нафтата“, рече Јеап Јун Ронг, пазарен стратег за „ИГ Азија“ (IG Asia Pte) во Сингапур.
Највисокиот функционер на Организацијата на земји извознички на нафта, ОПЕК, претходно овој месец ја истакна загриженоста за забавување на побарувачката во Европа и САД, а инвеститорите ќе внимаваат да видат дали повлекувањето ќе предизвика реакција од картелот и неговите сојузници.
Сепак, трговците ги напуштаат облозите дека Федералните резерви (ФЕД) ќе ги зголемат каматните стапки во услови на банкарски турбуленции.
Натамошните добивки на цената на нафтата може да бидат ограничени во блиска иднина, при што ОПЕК оваа недела прогнозираше скромен суфицит во вториот квартал, што вообичаено е типичен период на мека побарувачка пред летото. Меѓународната агенција за енергетика вчера соопшти дека пазарот веќе има вишок поради тврдоглаво високото руско производство.
Резервите на сурова нафта во САД се зголемија за 1,55 милион барели минатата недела, според податоците што вчера ги објави Управата за енергетски информации. Вкупниот нето-извоз на нафта, вклучувајќи сурова нафта и рафинирани производи, скокна на 3,5 милиони барели дневно. Таа бројка е надмината само еднаш од 1990 година.
.webp){kind=icon}
