.webp){kind=icon}
Европската Унија предлага да ја продолжи својата цел за намалување на побарувачката на гас за 15 проценти до следната зима, бидејќи се приспособува на намалувањето на руските резерви. Мерката, која беше донесена минатата година, во екот на енергетската криза, треба да истече на крајот на месецов.
Европската комисија, како извршен орган на блокот, денеска го објави продолжувањето, кое има широка поддршка меѓу 27-те земји-членки на ЕУ. Сè уште треба официјално одобрување од министрите за енергија на блокот, кои треба да се состанат следната недела.
Намалување на побарувачката за гас по земји во периодот од август 2022 до јануари 2023, споредено со просекот во последните пет години / Bloomberg Mercury
Европските земји се подготвуваат да ги наполнат складиштата за гас откако Русија го запре најголемиот дел од испораките како последица на војната во Украина. Регионот се потпира на увоз на течен природен гас и помала побарувачка со цел да може да го пополни недостигот.
Сепак, официјалните лица остануваат внимателни, бидејќи глобалниот пазар е тесен, објави на Твитер еврокомесарот за енергетика Кадри Симсон.
Меѓународната агенција за енергетика минатиот месец го нагласи ризикот за недостиг од гас во Европа оваа година доколку Москва целосно го прекине снабдувањето. Според податоците на Евростат, ЕУ намали околу 19 проценти од вообичаената побарувачка за гас во периодот од август до јануари.
Комисијата им постави цел на земјите-членки да ги наполнат подземните складишта до 90 отсто пред следната грејна сезона. Резервите за регионот сега се полни во просек околу 56 проценти, покажуваат податоците од „Гас инфраструктура Европа“ (Gas Infrastructure Europe).
Референтните фјучерси денеска за првпат од 2021 година паднаа под 40 евра за мегават-час. Иако намалувањето од 15 проценти е доброволно, тоа би можело да биде задолжително во случај на вонредна ситуација.
