Цената на европскиот гас паѓа, политичарите се борат со кризата

Европските цени на природен гас паднаа по големиот раст претходно, бидејќи трговците ги одмеруваат ризиците за снабдување во однос на потезите на владите и политичарите, кои се трудат да се изборат со последиците од најлошата енергетска криза во последните децении.

Референтните фјучерси паднаа за дури 6,2 отсто, по „дивеењето“ последните години. Одлуката на Русија минатата недела на неодредено време да го затвори клучниот гасовод Северен тек, кој што оди до Германија, ги принуди европските влади да планираат интервенции на пазарот.

Германија сака да ја ограничи цената на електричната енергија, мерка што би стапила во сила во текот на следните неколку недели. Полска настојува да ги ограничи цените на целиот увоз на гас. Но, исто така, ликвидноста би требало да биде во фокусот на разговорите со министрите за енергетика на состанокот во Брисел в петок.

Зголемеите залихи на горива, силниот прилив на течен природен гас (LNG) и пријатното време што се очекува во текот на следниот месец, ќе помогнат цените да се држат под контрола, по августовскиот рекорд. Но, и натаму останува загриженоста како Европа ќе ги надомести загубените залихи од испораката од Русија кога ќе залади времето и ќе се зголеми побарувачката. Исто така, постојат многу неизвесности во поглед на следните потези од Москва и конкуренцијата со Азија за LNG во текот на ладните месеци.

Снабдувањето од Норвешка, која што ја заменува Русија, како најголем европски снабдувач со гас, исто така е ограничено поради сезонското одржување. Испораките од таа нордиска земја денеска се на најниско ниво од средината на јули поради работните активности. Тие ќе се завршат во текот на следниот месец, но за сега тоа ги смалува опциите за зголемување на европските залихи на природен гас.

„Европскиот енергетски сектор и натаму е шокиран од нестабилната цена и неизвесноста во поглед на енергетскиот биланс за претстојната зима“, наведуваат аналитичарите од компанијата Rystad Energy. „Најлошото сценарио со многу ладно време, мало производство од ветер и намалување на побарувачката на гас за електрична енергија за вкупно 15 отсто би се покажало како голем предизвик за европскиот електроенергетски систем и би можело да доведе до рационализација на струја и недостиг од струја“, коментираат аналитичарите.

Холандкиот гас (TTF), што претставува референтна вредност за Европа, се тргува за 5,5 отсто пониско, по цена од 226,64 евра за мегават час. Британскиот еквивалент, пак, падна за 5,4 отсто.

Референтниот индекс на германската електрична енергија, исто така, падна за 3,8 отсто, на 515,50 евра за мегават час.

Во моментов нема коментари за веста. Биди прв да коментира...

Остави коментар