Нафтата поевтини по турбуленциите, иако помирниот тон се врати на финансиските пазари, кои се потресени од глобалната банкарска криза, при што инвеститорите се во готовност за какви било знаци на нови проблеми што може да му наштетат на апетитот за ризик.
ВТИ за испорака во април загуби еден отсто од вредноста и сега барел чини точно 67 долари. Договорите за испорака во мај, пак, кои се поатрактивни во моментов, загубија 0,7 проценти и се тргуваат по цена од 67,33 долари за барел. Нафтата брент за испорака исто така во мај потона за 0,8 отсто, со што барел се тргува по цена од 73,22 долари.
Движење на цената на ВТИ и нафтата брент / Bloomberg Mercury
Регулаторите и централните банки се вклучија во обидот да ја вратат довербата, делумно преку проектирањето на преземањето на „Кредит Суис“ (Credit Suisse Group AG) од страна на УБС (UBS Group AG). Во меѓувреме, во САД официјалните лица сега ги проучуваат начините на кои би можеле привремено да ја зголемат заштитата за сите депозити.
„Овие типови на кризи може да влијаат на расположението и јасно е дека тоа беше случај со огромната распродажба што ја видовме. Банкарската криза е погодно време за инвеститорите доколку сакаат повторно да воспостават нагорни позиции на нафтените и енергетските пазари“, изјави за ТВ „Блумберг“ Даниел Хајнс, висок стратег за стоки во Банкарската групација на Австралија и Нов Зеланд (Australia & New Zealand Banking Group Ltd).
Откако се тргуваше во тесен опсег на почетокот на годината, суровата нафта падна на ниско ниво поради банкарските превирања, стравувањата од рецесија и отпорноста на руските текови и достигна најниско ниво од 2021 година. Расположението за намалување на ризикот ги потопи знаците за силна кинеска побарувачка.
Банкарските потреси ги зголемија очекувањата дека големите централни банки, вклучувајќи ги и Федералните резерви (ФЕД), ќе го забават своето темпо на монетарно затегнување дури и во услови кога инфлацијата останува покачена. Креаторите на политиката на ФЕД одлучуваат за своите следни чекори в среда, при што инвеститорите ги зголемуваат облозите за покачување на каматите за четвртина поен.
„Суровата нафта и понатаму е поврзана со превирањата во банкарскиот свет: ако второто се смири, можеме да очекуваме стабилизирање на цените на нафтата. Средбата на ФЕД е меѓу клучните. Без разлика каква ќе биде одлуката, таа ќе влијае на расположението на финансиските пазари“, рече Вандана Хари, основач на „Ванда инсајтс“ (Vanda Insights) во Сингапур.
.webp){kind=icon}
