Нафтата порасна на отворањето на неделното тргување откако ОПЕК+ неочекувано најави намалување на производството на сурова нафта, што се заканува со затегнување на пазарот предизвикувајќи нов инфлаторен удар врз светската економија, што ја налути Белата куќа.
Цената на ВТИ за испорака во мај порасна за 5,5 проценти, искачувајќи се на 79,81 долари за барел, додека нафтата брент поскапе за 5,3 проценти и сега барел чини 84,14 долари.
Во еден момент ВТИ порасна дури за осум проценти, што е најголемо поместување во текот на денот за повеќе од една година.
Организацијата на земји извознички на нафта и сојузниците, вклучувајќи ја и Русија, вчера вети дека ќе го скрати производството почнувајќи од следниот месец, и тоа за над еден милион барели дневно, а најголемо намалување ќе има Саудиска Арабија, од дури 500.000 барели. Трговците очекуваа ОПЕК+ да го одржи стабилно производството.
Цена на ВТИ и нафтата брент / Bloomberg Mercury
Шокантниот потег дојде надвор од планираниот распоред на групата за преглед на пазарот и понудата на членовите. Влијанието на одлуката брзо се почувствува на глобалниот пазар на нафта. „Голдман Сакс“ (Goldman Sachs Group Inc) ги зголеми прогнозите за цените на нафтата за оваа и следната година, а обично тивката азиска трговска сесија забележа стотици илјади договори што ги сменија сопствениците. Се зголемија и терминските цени за бензините во САД, нагласувајќи ги инфлаторните ризици.
„Оваа мерка испраќа доста силен сигнал до пазарот дека тие ќе ги поддржат цените“, изјави за „Блумберг ТВ“ Даниел Хајнс, виш стратег за стоки во Банкарската групација на Австралија и Нов Зеланд (Australia & New Zealand Banking Group Ltd), додавајќи дека можноста суровата нафта да достигне 100 долари повторно сигурно се зголеми.
Од Белата куќа рекоа дека одлуката на ОПЕК+ е непромислена, истовремено додавајќи дека САД ќе работат со производителите и потрошувачите со фокус на цените на бензините. Минатата година претседателот Џо Бајден нареди ослободување без преседан од стратегиските резерви на сурова нафта на нацијата по руската инвазија врз Украина.
Во пресрет на ненадејната интервенција, суровата нафта го ограничи својот најлош пад од првиот квартал во 2020 година, бидејќи комбинацијата од превирања во банкарскиот сектор и ризиците од рецесија во САД претставуваат можност за уривање на цените. Сепак, многу набљудувачи на пазарот рекоа дека очекуваат заживување во втората половина, поткрепено со зголемената побарувачка во Кина по завршувањето на политиката на нулта ковид и рестрикциите.
Задача на ФЕД
Поскапите цени на суровата нафта се закануваат дополнително да ја поттикнат сè уште покачена инфлација, комплицирајќи ја задачата со која се соочуваат централните банки, вклучувајќи ги и Федералните резерви (ФЕД), да ги скротат постојаните ценовни притисоци. ФЕД минатиот месец повторно ги зголеми каматните стапки, а официјалните претставници треба да се состанат во мај за да ги утврдат следните чекори на монетарната политика.
Вестите за намалувањето на производството на нафта го засенија олеснувањето за пазарот од договорот постигнат меѓу полуавтономниот регион Курдистан во Ирак и федералната влада, со што оваа недела ќе продолжи извозот на нафта преку Турција. Прекинот на снабдувањето со нафта помогна ВТИ да добие повеќе од девет отсто на својата цена минатата недела.
„Потегот на ОПЕК+ има потенцијал да го турне пазарот во дефицит во вториот квартал, наспроти претходните очекувања за суфицит“, рече Вандана Хари, основач на „Ванда инсајтс“ (Vanda Insights) во Сингапур., додавајќи дека сепак повисоките цени може да намалат дел од побарувачката, но и да ја влошат тврдоглавата инфлација со која централните банки се обидуваат да се изборат, зголемувајќи ги притоа рецесиските ризици.
.webp){kind=icon}
