.webp){kind=icon}
Во текот на вчерашниот ден нафтата ја постигна својата најголема добивка во една година откако ОПЕК+ најави значително намалување на производството, што ќе го затегне глобалниот пазар. Цената на ВТИ вчера се зголеми за повеќе од шест проценти.
Утрово ВТИ за испорака во мај продолжи да расте, па ја зголеми вредноста за 0,5 проценти, со што барел се тргува по цена од 80,81 долари. За исто толкав процент порасна и нафтата брент за испорака во јуни во рамките на денешното тргување и сега барел од оваа нафта чини 85,33 долари.
Ненадејното намалување на понудата од страна на ОПЕК+ го заслепи глобалниот пазар на сурова нафта, што поттикна многу банки да ги подобрат своите прогнози за цените. Постои загриженост дека потегот на ОПЕК+ ќе внесе нова енергија во инфлаторните притисоци, при што американската министерка за финансии Џенет Јелен ја критикуваше одлуката на групата како „неконструктивна“. Сепак, претседателот Џо Бајден ја минимизираше загриженоста, велејќи доцна вчера дека влијанието веројатно не е толку лошо како што се мисли.
Движење на цената на ВТИ и нафтата брент / Bloomberg Mercury
Суровата нафта порасна за околу една четвртина од ценовниот колапс што го доживеа во средината на март, кога беше на најниско ниво од крајот на 2021 година. Закрепнувањето првично беше поттикнато од очекувањата дека кинеската побарувачка ќе се засили со завршувањето на политиката на нулта ковид, како и со прекините на испораките од Ирак. Одлуката на ОПЕК+ да го намали производството за повеќе од еден милион барели дневно претставува дополнителен поттик за цената на нафтата.
Групата на производители почнала да ја разгледува потребата за промена на политиката на 20 март, информираат лица запознаени со ова прашање, кога вредноста на нафтата брент потона на најниско ниво во последните 15 месеци.
Иако американските дупчачи на нафтени полиња може да го видат ова како можност за зголемување на производството, малку е веројатно дека проширувањето на производството ќе може да ги надомести најавените кратења на количествата.
Многумина на Волстрит, вклучувајќи ја и „Голдман Сакс“ (Goldman Sachs Group Inc), ги ревидираа во нагорна линија своите прогнози за цените на нафтата по објавената одлука на ОПЕК+. Сепак, „Морган Стенли“ (Morgan Stanley) го отфрли трендот, истакнувајќи дека растот на побарувачката во Кина заостанува зад очекувањата и со тоа ја намалува нејзината перспектива. И „Ситигруп“ (Citigroup Inc) исто така ги отфрли прогнозите за брзо враќање на 100 долари за барел.
„Овој потег испраќа силна порака до пазарот, при што ОПЕК повлече линија во песок во однос на цените на нафтата“, се вели во белешката на АНЗ (ANZ Group Holdings Ltd), каде што се додава дека намалувањето на понудата брзо ќе го турне пазарот во дефицит.
