Нафтата го задржа најголемиот дел од дводневниот пораст, што ja доведе суровата нафта до највисокото затворање од ноември, додека трговците ги разгледуваат знаците за затегнување на глобалниот пазар и чекаат месечни прогнози од Организацијата на земји извознички на нафта (ОПЕК).
По дводневниот раст од 4,4 проценти, ВТИ поевтини за 0,3 отсто и барел се тргува по цена од 83,02 долари. Нафтата брент за испорака во јуни падна исто така за 0,3 проценти, на 87,03 долари за барел.
Добивките беа поттикнати од уште еден пад на резервите на сурова нафта во клучниот центар за складирање Кушинг, Оклахома, потоа од знаците за послаб извоз на руска нафта, како и од прекините на испораките на гасоводот од ирачки Курдистан.
Движење на цената на ВТИ и нафтата брент / Bloomberg Mercury
ОПЕК ќе ја објави својата месечна анализа во текот на денов, со што ќе понуди нов увид во пазарните салда во текот на 2023 година, откако картелот и неговите сојузници, вклучувајќи ја и Русија, претходно овој месец објавија изненадувачко намалување на производството. Вчера Фатих Бирол, раководител на Меѓународната агенција за енергија, рече дека побарувачката најверојатно ќе ја надмине понудата во втората половина.
Суровата нафта силно закрепна откако во март го достигна најниското ниво во последните 15 месеци. Брзото оживување на нафтата беше поддржано и од знаците дека инфлацијата во САД се намалува, што потенцијално ќе им овозможи на банкарите од Федералните резерви (ФЕД) да ја паузираат кампањата за зголемување на каматите.
„Загриженоста за затегнатото снабдување и натаму е присутна по извештаите за слабеење на руските испораки, намалување на производството на ОПЕК и повлекување на резервите во САД. Од страната на побарувачката се намали загриженоста, бидејќи вчерашниот американски извештај за инфлацијата дополнително укажа на зголемувањето на каматните стапки во мај, со растечки знаци на дезинфлација“, рече Чару Чанана, пазарен стратег за „Саксо“ (Saxo Capital Markets Pte).
Денешниот мал пад на суровата нафта дојде и покрај податоците од Кина, најголемиот увозник на сурова нафта во светот, кои укажаа на голема побарувачка бидејќи ја оставија зад себе политиката на нулта ковид. Земјата во март испорача најмногу нафта во речиси три години, поткрепена со рекордните руски текови, според официјалните податоци објавени во четвртокот.
.webp){kind=icon}
Во моментов нема коментари за веста. Биди прв да коментира...