.webp){kind=icon}
Нафтата се движи кон втор неделен пад бидејќи загриженоста за побарувачката се врати во прв план, потиснувајќи ги добивките поттикнати од едностраното ветување на Саудиска Арабија дека ќе го намали производството.
ВТИ за испорака во јули утрово падна за 0,5 проценти, на 70,91 долар за барел, а за исто толкав процент се намали и брент нафтата за испорака во август, со тоа што нејзината цена сега е 75,58 долари за барел. Инаку, ВТИ неделава загуби околу еден отсто од својата вредност.
Оптимизмот околу потегот на Ријад да го намали производството за најмалку еден милион барели дневно брзо беше заменет со влошените изгледи за потрошувачката. Од „Ситигруп“ (Citigroup Inc.) рекоа дека намалувањата нема да ги неутрализираат слабите пазарни основи.
Извештаите во блискоисточните медиуми, вклучително и израелскиот весник „Хаарец“ (Haaretz), дека САД и Иран постигнале напредок во нуклеарните разговори што може да доведе до поголемо снабдување од Исламската Република, помогнаа суровата нафта вчера да се намали за 1,7 отсто. Сепак, американските власти рекоа дека извештаите за привремен договор се лажни.
Неделна промена на цената на ВТИ нафтата / Bloomberg Mercury
Референтната вредност на американската нафта падна за околу 15 проценти од врвот достигнат во средината на април, главно како резултат на знаците дека закрепнувањето на Кина е во застој и дека САД ќе треба да продолжат да ги зголемуваат каматните стапки за да ја зауздаат инфлацијата. Рускиот извоз на сурова нафта, исто така, беше поотпорен од предвиденото, зголемувајќи ја понудата.
„Падот на цената на нафтата од состанокот на ОПЕК+ веројатно ги одразува стравувањата за глобалниот раст и загриженоста за побарувачката на нафта“, рече Вивек Дар, директор за истражување на рударството и енергетските стоки во „Комонвелт банка на Австралија“ (Commonwealth Bank of Australia). Сепак, тој смета дека саудиските намалувања веројатно ќе доведат до недостаток на нафтените пазари, но подоцна оваа година.
Во меѓувреме, залихите на сурова нафта во Кина во мај достигнаа највисоко ниво во последните две години бидејќи побарувачката не ги исполни очекувањата во услови на разочарувачко економско закрепнување. Потрошувачката во најголемата азиска економија стагнира во исто време кога преработувачите го прекинаа пролетното одржување.
