.webp){kind=icon}
Добре дојдовте во 2024 година! Екстремните временски услови, економската несигурност и зголемените геополитички ризици од Украина и Русија до Израел и поширокиот Блиски Исток беа доминантни теми минатата година и ќе бидат дел од приказната во неделите и месеците што следуваат. Зголемените тензии во Црвено Море ги нарушија испораките со контејнери преку клучниот трговски пат, зголемувајќи ги изгледите за поскапување на стоките бидејќи бродовите се принудени да пловат по подолги маршрути. Додека трговците со нафта во голема мера ги минимизираа ефектите од конфликтот во последните денови од 2023 година, во првите сесии на тргување во јануари таа повторно покажува нестабилност.
Подолу пет значајни графикони што треба да се земат предвид на светските пазари на стоки годинава.
Преглед на секторот
Акциите на американските компании од енергетскиот сектор претрпеа стресни моменти во 2023 година, во услови на несигурна слика за понудата, што доведе до пораст на цените на нафтата во текот на септември, пред да се олабават до крајот на годината, бидејќи глобалните резерви растеа. Енергетскиот индекс S&P 500 падна за 4,8 проценти и се рангираше на второто најлошо место меѓу 11-те индустриски групи од S&P 500. Тоа е остар пресврт на среќата по извонредните перформанси во претходната година благодарение на зголемените цени на енергијата и рекордниот профит. Во иднина, „Блумберг интелиџенс“ (Bloomberg Intelligence) гледа потенцијал за континуирана распродажба во секторот. Комуналните услуги - кои ги вклучуваат „Констелејшн енерџи“ (Constellation Energy Corp.), „Дјук енерџи“ (Duke Energy Corp.), „Доминјон енерџи“ (Dominion Energy Inc.) и „Некстера енерџи“ (NextEra Energy Inc.) - беа најлоши, со пад од 10 проценти.
Сурова нафта
Нафтата неодамна го доживеа првиот годишен пад од 2020 година. И иако нема кристална топка за да се утврди што се очекува за 2024 година, едно е јасно: понудата ќе остане движечки фактор. Рекордното производство во САД и зголеменото производство од земјите што не се членки на ОПЕК+ придонесоа за глобална презаситеност, и покрај ветувањата на Организацијата на земјите извознички на нафта за ограничување на снабдувањето. Инвеститорите укажуваат дека поради брзите промени кај распонот на цените, нафтата од типот брент повторно флертува со контанго (надолна пазарна структура што сигнализира прекумерна понуда каде што барелите за итна испорака се поевтини од идните договори). УБС (UBS Group AG) ги намали прогнозите за глобалниот нафтен репер бидејќи резервниот производствен капацитет на картелот се зголемува, при што се очекува брент да се задржи во опсегот на тргување од 80 до 90 долари за барел годинава. „Морган Стенли“ исто така ги намали прогнозите за цените.
Блумберг
Енергетски договори
Блокбастер-преземањата од „Ексон мобил“ (Exxon Mobil Corp.), „Шеврон“ (Chevron Corp.) и „Оцидентал петролеум“ (Occidental Petroleum Corp.) ја направија 2023 година за паметење во глобалната енергетска индустрија. Тие зделки ја зголемија вкупната вредност на најавените спојувања и преземања на 346,2 милијарди долари, според податоците собрани од „Блумберг“. Тоа е 80 проценти повеќе од претходната година, а поголеми трансакции биле објавени само во 2014 и 2018 година. Минатогодишните договори беа поттикнати од преземањата во потсекторот нафта и гас, со 229,9 милијарди американски долари во најавените трансакции, што претставува најголем годишен резултат за овој енергетски потсектор во најмалку четвртина век. Шефовите на американските шкрилци се подготвуваат за повеќе мегадоговори годинава, покажува кварталното истражување на Банката на федерални резерви на Далас. Во четвртокот, „АПА корп“ (APA Corp.) се согласи да го купи истражувачот на шкрилци „Калон петролеум“ (Callon Petroleum Co.) за 2,6 милијарди долари.
Испораки
Бунтовниците Хути поддржани од Иран го прекинаа транспортот во Црвено Море во изминативе два месеца, во обид да му стават крај на израелскиот воен напад врз Газа. Некои од најголемите светски бродски фирми го избегнуваат виталниот трговски коридор, што ги комплицира нормалните текови меѓу Европа и Азија, принудувајќи некои бродови да тргнат по поскапата маршрута околу ‘Ртот на Добрата Надеж. Неодамна, бродовите што патуваат низ теснецот Баб ел-Мандеб - кој обезбедува стратегиска врска меѓу Средоземно Море и Индиски Океан преку Црвено Море и Суецкиот Канал - нагло паднаа, според податоците на „ММФ портвоч“.
Блумберг
Метали
Иднината на цената на златото во голема мера почива во рацете на Федералните резерви на САД. Очекувањата дека централната банка е подготвена да ги намали каматните стапки порано од очекуваното помогнаа благородниот метал да дојде до рекорд минатиот месец. Но таа еуфорија оттогаш се ублажи, со тоа што пазарите за размена сега гледаат повеќе од 60 проценти шанси за намалување до март, што е помалку од шансите од 85 проценти забележани кон крајот на декември. Инвеститорите на берзанските фондови поддржани од злато се на работ, а декември е седмиот месец по ред во кој се бележат одливи. Трендот можеби нема да се смени додека пазарот не се убеди дека Фед е цврсто на пат на полабава монетарна политика, која има тенденција да му помогне на некаматоносниот метал.
Блумберг
