„Голдман“ ги смали проекциите за цената на бакарот поради намалената побарувачка во Кина

Побавниот економски раст во Кина ќе го одложи очекуваниот скок на цените на бакарот, велат аналитичарите од „Голдман Сакс“ (Goldman Sachs Group Inc.), кои исто така ги намалија проекциите за цената на бакарот за речиси 5.000 долари за тон.

Значителен пад на резервите на бакар нема да се случи толку брзо како што очекуваа аналитичарите, се наведува во забелешката на аналитичарите предводени од Саманта Дарт и Даан Струјвен. „Голдман“ ја намали својата проекција за 2025 година на 10.100 долари за тон и сега очекува 12.000 долари по тон не за крајот на годинава, туку за 2026 година.

„Голдман“ исто така ја намали прогнозата за цената на алуминиумот за 2025 година од 2.850 долари на 2.540 долари за тон. Тие не се оптимисти ниту за цената на железната руда и никелот и порачаа дека поради геополитички и финансиски ризици ќе го изберат златото меѓу безбедните класи на средства.

Промената во проекцијата се должи на акумулацијата на резерви на суровини во Кина, каде што цените се премногу ниски за производителите да ги расчистат своите резерви. Поради состојбата на пазарот на недвижности и зголемените предизвици со кои се соочуваат производствениот сектор и извозниците, сè помалку е сигурно дека Пекинг ќе успее да го постигне целниот економски раст од пет проценти.

„Помалата побарувачка за суровини во Кина и шансите да не се постигне целниот економски раст нè наведоа да заземеме повнимателен однос кон суровините“ и повнимателно да ги избираме, велат аналитичарите на банката.

Златото е исклучок и токму тука се гледаат најголемите шанси за позитивно изненадување, велат аналитичарите, кои ја оставија проекцијата на цената на златото на 2.700 долари за унца до почетокот на 2025 година. Цената ќе биде под влијание на прометот меѓу институционалните инвеститори на Запад, намалувањето на каматните стапки од страна на Фед и континуираната побарувачка за злато меѓу централните банки, додаваат тие.