Нафтата поевтине по дводневниот раст бидејќи трговците ги проценуваат индициите за поголеми резерви од сурова нафта во САД, тензиите на Блискиот Исток и насоката во која ќе се движат одлуките на американските Федерални резерви (Фед).
Нафтата брент падна на 73 долари за барел, додека ВТИ (WTI-West Texas Intermediate) се тргува на ниво од околу 71 долар. Извештајот на Американскиот институт за нафта покажува дека резервите од сурова нафта минатата недела пораснале за речиси два милиона барела, а се зголемуваат и резервите од бензин и дестилати.
На Блискиот Исток, Хезболах, поддржан од Иран, го обвини Израел дека организирал напад преку пејџери во Либан, во кој загинаа голем број луѓе, а илјадници се ранети. Инцидентот ги зголеми стравувањата од сеопфатна војна во регионот, што резултираше со пораст на цените во текот на вчерашниот ден.
„Иако заднината е сè уште негативна, се прават напори да се смират екстремните надолни чувства. Последниот инцидент во Либан врати одредена несигурност за поширок конфликт“, изјави Јеап Јун Ронг, пазарен стратег во ИГ Азија (IG Asia Pte) во Сингапур.
Цената на суровата нафта останува значително пониска од нивото на кое беше на почетокот од годинава, главно поради несигурните изгледи за побарувачката во Кина. Имено, денешните податоци покажуваат дека увозот во август паднал за седум отсто, а дополнителна неизвесност даваат и плановите на ОПЕК+ (Организацијата на земји извознички на нафта и нивните сојузници) да ја ограничи понудата што на крајот влијае на цените. Тоа делумно се компензира со изгледите за олабавување на американска монетарна политика, при што инвеститорите очекуваат дека Фед е подготвен да започне со намалување на каматните стапки иако нема консензус за големината на првичното намалување.
Како одраз на слабата побарувачка некои рафинерии во Европа ја намалија преработката бидејќи им се намалува профитот. Во Кина, пак, најголемата земја увозник на нафта во светот, лошите маржи доведоа до банкрот на две мали фабрики.
.webp){kind=icon}
Во моментов нема коментари за веста. Биди прв да коментира...