Еболата надвор од контрола во Конго: Над 200 жртви и хаос на терен

Епидемијата на ебола во источниот дел на Демократска република Конго досега можеби однела повеќе од 200 животи, додека бројот на сомнителни случаи надминува 900, покажуваат податоците на Министерството за здравство. Ситуацијата е дополнително влошена од насилствата, недовербата во институциите и сериозно преоптоварените здравствени служби во конфликтните региони.

Според последните податоци, случаите се регистрирани во 11 здравствени зони во три источни провинции, а заклучно со 23 мај се евидентирани околу 210 сомнителни смртни случаи. Здравствените власти предупредуваат дека реалниот број на жртви може да биде и поголем.

Епидемијата се шири во област каде вооружени групи контролираат дел од територијата, а здравствената инфраструктура е слаба. Нападите врз медицински центри и раселувањето на населението значително го отежнуваат следењето на контактите и контролата на ширењето на вирусот.

Генералниот директор на Светската здравствена организација (СЗО), Тедрос Гебрејесус, изјави дека насилството директно ја попречува епидемиолошката реакција, бидејќи здравствените работници се принудени да се повлекуваат од теренот. Според податоците, само околу 20 отсто од идентификуваните контакти успеваат да бидат следени во еден ден.

Во градот Монгбвалу, гневни жители упаднале во болница каде се лекувале пациенти со ебола, откако властите одбиле да ги предадат телата на починатите поради безбедносни ризици.

Претходно, во провинцијата Итури, каде што епидемијата првпат била откриена и каде се концентрирани најмногу случаи, биле пријавени напади врз центри за лекување, палење на медицински шатори и бегство на пациенти.

Регионалните здравствени министри, на состанок во Кампала предупредија дека нестабилните граници, активните рударски рути и големите миграции го зголемуваат ризикот од прекугранично ширење на вирусот.

Според директорот на АЦДЦП (Africa Centres for Disease Control and Prevention), Џин Касеја, дури десет африкански земји се сметаат за изложени на ризик поради слаб надзор и ограничени дијагностички капацитети.

Сегашната епидемија е предизвикана од реткиот бандибуџо сој на ебола, за кој сè уште нема одобрена вакцина или специфичен третман. СЗО на 17 мај ја прогласи епидемијата за јавно-здравствена вонредна состојба од меѓународни размери.

Соседна Уганда веќе пријави пет потврдени случаи поврзани со истото жариште.

Според американските здравствени власти, еден заразен американски државјанин кој се грижел за пациенти во Конго е евакуиран на лекување во Германија, додека лица со високоризичен контакт се префрлени во Германија и Чешка за следење и третман.

Експертите предупредуваат дека без стабилизација на безбедносната ситуација, контролата на епидемијата ќе остане исклучително тешка, со ризик од натамошно регионално ширење.