.webp){kind=icon}
ПОЛИТИКА
Трамп вети дека ќе воведе дополнителни царини за Кина, Мексико и Канада
Новоизбраниот американски претседател Доналд Трамп, преку објави на социјалната мрежа Трут (Truth Social), најави дека ќе воведе дополнителни 10 проценти царини на стоки од Кина и 25 проценти на сите производи од Мексико и Канада. Тој рече дека тие мерки се потребни за спречување на нелегалните мигранти и дроги што влегуваат во САД. По првата закана за царини од изборите, канадскиот долар падна на најниско ниво во последните четири години, додека мексиканскиот пезос се тргуваше блиску до најслабото ниво од 2022 година. Падна и офшор јуанот, кој главно се тргува во Хонгконг - и тоа на најниско ниво во четири месеци.
Очекувано, доларот скокна. Индикаторот на американската валута на „Блумберг“ (Bloomberg) прво порасна за 0,7 проценти по таа вест, а подоцна ги намали тие добивки - скокнувајќи за 0,3 проценти.
Да потсетиме, „Блумберг Адрија“ во понеделникот се занимаваше токму со царинската политика на Трамп, бидејќи најавените царини преку Кина и ЕУ би можеле индиректно да влијаат на извозот на српски челик.
ЕУ планира да санкционира кинески компании што ѝ помагаат на Русија
Европската Унија предложи санкционирање на неколку кинески компании за кои тврди дека ѝ помогнале на Русија да развие дронови за напад на Украина. Истовремено, Европската комисија разгледува воведување дополнителни рестрикции за руски нафтени танкери, за да ја ограничи способноста на Москва да ги заобиколи постојните рестриктивни мерки. Овие предлози доаѓаат во момент кога министрите за надворешни работи на Групата 7 се состанаа во Италија за да преземат „соодветни мерки“ против Кина и другите земји што ги поддржуваат руските воени напори во Украина.
БИЗНИС
Биткоинот падна на 94.522 долари
На пазарот на криптовалути, вредноста на биткоинот падна на 94.522 долари, бележејќи најдолга низа загуби од победата на Доналд Трамп на американските претседателски избори. Најголемата светска криптовалута падна поради зголемената аверзија кон ризик, откако републиканецот ги вознемири пазарите со објавување на плановите за дополнителни царини.
Да потсетиме, биткоинот минатата недела достигна вредност од речиси 100 илјади долари на крилата на позитивните ставови на новоизбраниот американски претседател кон криптовалутите. Сепак, некои пазарни набљудувачи се прашуваат дали „пумпата на Трамп“ носи нови ризици за дигиталниот имот.
Bloomberg
Кинескиот гигант си е доволен самиот себеси
„Шаоми“ (Xiaomi Corp.) подготвува процесор за своите претстојни паметни телефони што компанијата ги дизајнираше самостојно, во обид да ја намали зависноста од странски доставувачи како „Куалком“ (Qualcomm Inc.) и „Медијатек“ (MediaTek Inc).
Иновативниот процесор може да му помогне на „Шаоми“ да биде целосно независен на пазарот и да се истакне меѓу другите купувачи на делови од „Куалком“. Се очекува масовното производство на овој чип да започне во 2025 година, според извори што сакаа да останат анонимни.
БЕРЗИ
Европа
Фјучерсите на европските акции денеска се тргуваат претежно во црвено, додека берзите тргувањето во понеделникот го завршија со добивки, бидејќи пазарите позитивно реагираа на номинацијата на Скот Бесент за нов американски министер за финансии.
САД
Истовремено, фјучерсите на американските акции се тргуваат мешано, повторно поради ветувањето на Трамп за царини за Кина, Мексико и Канада. Трговците се фокусирани и на претстојната одлука на Федералните резерви за каматите, а претседателот на разгранокот на Фед во Минеаполис (Минесота), Нил Кашкари, вели дека е разумно да се намалат каматните стапки на состанокот во декември.
Азија
Кога станува збор за акциите во азиско-пацифичкиот регион, и тие се тргуваат мешано поради најавената царинска политика. Значи, јасно е дека новата американска администрација дејствува директно и индиректно низ светот.
Регионалниот индекс и акциите во Јапонија бележат пад, додека кинескиот индекс се тргува со незначителни добивки на крилата на очекувањата дека Пекинг, сепак, ќе го зголеми фискалното олеснување за да го поддржи економскиот раст соочен со растечки геополитички тензии. Во моментот на пишувањето на овој текст, кинескиот офшор јуан ослабе за 0,4 проценти, додека мексиканскиот пезос падна за повеќе од еден процент.
Во меѓувреме, нафтата мирува. Но не само поради одмерувањето на најавените царини туку и поради напредокот во договорот за прекин на огнот меѓу Израел и Хезболах. Брентот се тргуваше над 73 долари по барел, а ВТИ (West Texas Intermediate) беше близу 69 долари.
