САД денеска, 28 ноември, го прославуваат Денот на благодарноста, еден од најважните национални празници. Иако берзата останува затворена за време на викендите и големите празници во годината, како Денот на благодарноста, тоа не значи дека светот „спие“. Ги следиме другите случувања од сферата на политиката, економијата и бизнисот.
ЕКОНОМИЈА И ПОЛИТИКА
Се продлабочува политичката криза во Франција
Потенцијалното уривање на француската влада и сè подлабоката политичка криза продолжуваат да ги загрижуваат инвеститорите. Акциите на француските банки во средата завршија со загуби поголеми од четири проценти, додека разликата помеѓу француските десетгодишни обврзници и побезбедните германски обврзници порасна на највисоко ниво во повеќе од една деценија.
Имено, француската влада би можела да се распадне во наредните недели поради потенцијалното гласање за недоверба, кое би можело да го собори премиерот Мишел Барние од функцијата. Неговиот политички опстанок зависи од тоа како ќе гласа партијата на Марин Ле Пен, Национално обединување.
Притоа, падот на владата не би бил проблем само за Франција туку и за целата еврозона, во момент кога Европа се бори со слабата германска економија и најавата за трговски ограничувања од САД. Во меѓувреме претседателката на Европската централна банка (ЕЦБ), Кристин Лагард, нагласи дека Европската Унија (ЕУ) би можела да биде во подобра позиција ако разговара со САД за потенцијалните трговски тарифи наместо веднаш да воведе контрамерки.
Кристин Лагард
Bloomberg
Трамп избра специјален пратеник за Украина и Русија
Новоизбраниот американски претседател Доналд Трамп го номинира Кит Келог за специјален пратеник за Украина и Русија, ангажирајќи пензиониран генерал што повика на прекин на воената помош за Украина.
„Кит беше со мене од самиот почеток! Заедно ќе обезбедиме мир преку сила и ќе ги направиме Америка и светот повторно безбедни!“, напиша Трамп на социјалната мрежа Трут (Truth Social). Републиканецот на истата платформа им го честиташе Денот на благодарноста на сите, вклучувајќи ги и, како што вели, „радикалните левичари, кои толку многу направија за да ја уништат нашата земја“.
Што се однесува до биткоинот, најпопуларната криптовалута кон која Трамп е наклонет, во четвртокот продолжи да се приближува до нивото од 100.000 долари. Што го поттикна овој раст? Сигналите што укажуваат на тоа дека кандидатите за одредени позиции во новата влада, кои се наклонети кон криптовалутите, веројатно ќе ги обликуваат американските финансиски правила во наредниот период. Биткоинот порасна најмногу во две недели, достигнувајќи 97.361 долар во средата, пред да ги намали добивките на 95.500 долари во четвртокот во 05.45 часот во Лондон.
ДВИЖЕЊЕ НА НАФТАТА
Клучната суровина во четвртокот доживеа мали промени, бидејќи тргувањето на берзата се смири пред Денот на благодарноста. Брентот беше близу 73 долари, а ВТИ (WTI) под 69 долари за барел. Фокусот останува на состанокот на ОПЕК+ викендов.
Bloomberg
БИЗНИС
„Гугл“ сака да ја поништи пресудата во спорот со „Епик гејмс“
На корпоративен план, „Гугл“ (Google) бара од федералниот апелациски суд да ја отфрли пресудата во случајот на антимонополскиот спор што го поведе „Епик гејмс“ (Epic Games), креаторот на „Фортнајт“ (Fortnite). Оваа пресуда го принудува технолошкиот гигант да дозволи функционирање на продавници за апликации од трети страни во рамките на оперативниот систем Андроид (Android).
„Гугл“ наведе дека пресудата на американскиот судија Џејмс Донахо е погрешна и побара исходот од долготрајната парница да се поништи. Да потсетиме дека „Гугл“ веќе извојува слична победа, кога ја победи ЕУ на суд поради обвинението за монопол во онлајн огласувањето. Сепак, со САД е поинаку.
Како што неодамна пишуваше „Блумберг Адрија“ (Bloomberg Adria), антимонополските службеници на американското Министерство за правда ќе побараат од Федералниот суд да го принуди „Гугл“ да го продаде својот пребарувач Хром. Тој потег би ѝ задал силен удар на една од најголемите светски технолошки компании.
.webp){kind=icon}
