Откако дојде на власт на почетокот на годинава, Доналд Трамп не престанува да ги вознемирува глобалните пазари, па така, поради неговата политика, и златото достигна нов рекорд во вторникот. Сосема е извесно дека е на повидок трговска војна, велат голем број пазарни набљудувачи, бидејќи ни царините „не мируваат“, напротив.
ПОЛИТИКА
Даноци од 25 проценти за увоз на алуминиум и на челик
Американскиот претседател нареди воведување царини од 25 проценти за увоз на челик и на алуминиум, во рамките на неговите напори да го заштити домашното производство на тие метали. Царините ќе се применуваат на целиот американски увоз на челик и алуминиум, вклучувајќи го и увозот од Канада и од Мексико, кои се меѓу најголемите американски доставувачи во тој домен. Новите царински стапки ќе стапат во сила на 12 март, а Трамп предупреди и на можноста за нивно дополнително зголемување. Освен тоа, тој рече дека ќе ја разгледа опцијата за исклучок за Австралија.
Ломбард: Ќе го задржиме дигиталниот данок
„Франција нема да се откаже од својот данок на дигитални услуги, кој ги погодува големите американски технолошки компании“, изјави министерот за финансии Ерик Ломбард во интервју за „Блумберг“. „Тоа не е предмет на преговори, веќе го усвоивме и нема да се промени“, додаде тој.
Да потсетиме, Франција во 2019 година беше меѓу првите земји што воведоа данок на дигитални услуги, кој цели на приходите на глобалните технолошки компании. Трамп тогаш рече дека данокот е „неправедна дискриминација на американските компании“ и се закани со контрамерки во вид на воведување царини на одредени француски производи.
БИЗНИС
Маск сака контрола над „Опен еј-ај“
На корпоративен план, група инвеститори предводени од Илон Маск понудија повеќе од 97,4 милијарди долари за купување на непрофитната организација што го контролира „Опен еј-ај“ (OpenAI). Со тоа, како што оценува „Блумберг“, дополнително ескалира конфликтот помеѓу извршниот директор на „Тесла“ и компанијата „Опен еј-ај“. Во реакција на најновата понуда, извршниот директор на „Опен еј-ај“, Сем Алтман, му се заблагодари на Маск на неговата платформа X и ја одби понудата.
БЕРЗИ
Европа
Фјучерсите на европските акции во вторникот наутро се тргуваа мешано, а европските берзи тргувањето во понеделникот го завршија со добивки, иако американскиот претседател најави воведување царини за увоз на алуминиум и на челик.
САД
Фјучерсите на американските акции моментално се тргуваат мешано, пред обраќањето на претседателот на Фед, Џером Пауел, пред американскиот Конгрес. Да потсетиме, американските индекси го завршија тргувањето во понеделникот со добивки, при што технолошкиот Nasdaq порасна за еден процент. Истовремено, побарувачката за сигурно прибежиште ја зголеми вредноста на доларот трета сесија по ред, додека златото накратко порасна над 2.940 долари и постави нов рекорд.
Азија
Кога станува збор за акциите во азиско-пацифичкиот регион, тие се тргуваат претежно во црвено, поради распродажбата на акции во Хонгконг и континентална Кина. Пазарите во Јапонија беа затворени во понеделникот поради празник.
.webp){kind=icon}
