Франција одново ја разгорува војната за пензиите поради зголемениот јаз во финансирањето

Францускиот државен ревизор рече дека дефицитот на јавниот пензиски систем нагло ќе се зголеми во наредните години, што претставува предупредување пред преговорите што се клучни за опстанокот на владата на премиерот Франсоа Бајру.

Извештајот од Ревизорскиот суд (Cour des Comptes) е првиот чекор во тримесечните разговори меѓу работничките синдикати и бизнис-организациите за ревидирање на длабоко непопуларниот пензиски закон на претседателот Емануел Макрон од 2023 година, кој постепено ја зголемува минималната возраст за пензионирање од 62 на 64 години.

Опозициските партии притискаат барем делумно да се поништат промените за прагот на возраста за пензионирање, но несигурните финансии ќе го ограничат просторот за маневрирање.

Во извештајот се забележува дека суфицитот во 2023 година е изолиран случај, што ќе се смени уште веднаш (во 2024 година). Без промени, годишниот дефицит ќе продолжи да се влошува и во 2035 година ќе достигне 15 милијарди евра, а во 2045 година ќе се зголеми двојно.

„Финансиските изгледи до 2045 година претставени во овој извештај се загрижувачки“, рече државниот ревизор. „Поволните ефекти врз рамнотежата на системот поврзани со реформата во 2023 година треба да ослабнат и вкупниот дефицит нагло да се влоши“.

Повторното отворање на експлозивната дебата за пензиите во Франција беше централната отстапка што Бајру им ја понуди на социјалистичките пратеници во јануари за да ги спречи да изгласаат недоверба за неговата влада поради буџетот. Ако исходот од разговорите не ги задоволи опозициските партии, тој одново ќе се соочи со гласање за недоверба како што се случи со претходната влада во декември.

Бајру вети дека парламентот може да работи на законодавство што се темели на каков било договор што ќе произлезе од разговорите со синдикатите, но рече дека предложените промени не смеат да ја влошат финансиската рамнотежа на огромниот јавен систем. Тој го задолжи Ревизорскиот суд да ја реши долготрајната дебата за тоа колку точно е голем пензискиот дефицит.

Пензиската реформа на Макрон во 2023 година предизвика масовни протести бидејќи синдикатите и опозициските партии рекоа дека зголемувањето на минималната возраст за пензионирање за да се затворат финансиските дупки во системот неправедно ги казнува нискоквалификуваните работници што ја започнале својата кариера на млада возраст.

Владата во тоа време го протурка законот и покрај негодувањата бидејќи беа исклучени обидите за балансирање на системот преку намалување на исплатите на пензиите или зголемување на придонесите што ги плаќаат работниците и работодавците.

Сепак, опозициските партии од левицата и екстремно десничарската партија на Марин Ле Пен продолжија да бараат намалување на возраста за пензионирање.

Според Ревизорскиот суд, ако се задржи минималната возраст за пензионирање на 63 години, наместо да се зголеми на 64 години, како што беше планирано, ќе ги чини јавните финансии дополнителни 13 милијарди евра годишно до 2035 година. Спротивно на тоа, зголемувањето на возраста на 65 години ќе донесе годишен пораст на јавните финансии од 17,7 милијарди евра до истата пресметковна година.

Во моментов нема коментари за веста. Биди прв да коментира...

Остави коментар