Американскиот претседател Доналд Трамп во понеделникот во Белата куќа се сретна со претседателот на Франција, Емануел Макрон. Двајцата лидери пред состанокот одговараа на прашања од новинарите за војната во Украина, можните царини за Европа и иднината на НАТО. Состанокот се одржа откако Трамп го продлабочи јазот на Вашингтон со сојузниците околу украинското прашање, повлекувајќи ја осудата на САД за руската инвазија во Обединетите нации и меѓу земјите од Групата седум.
ПОЛИТИКА
САД и Русија против резолуцијата за Украина
Американскиот претседател го продлабочи јазот со сојузниците во врска со Украина, откако САД гласаа против резолуцијата со која се осудува руската инвазија врз оваа земја. На Генералното собрание на Обединетите нации, САД и Русија гласаа против резолуцијата, која ја предложија Украина и европските земји, а во која се споменува „инвазијата на Русија врз Украина во целосен обем“, која започна во 2022 година. Вашингтон и Москва подоцна, првпат од почетокот на војната, се здружија во Советот за безбедност за да ја одобрат американската резолуција со која се повикува на брзо завршување на конфликтот и во која Русија не се обвинува за почетокот на војната. Ова, според оцената на „Блумберг“ (Bloomberg), е целосен пресврт во однос на политиката на претходниот американски претседател Џо Бајден.
Кога ќе се сретнат Трамп и Путин?
Очигледно е дека Трамп ги забрзува своите планови во врска со завршувањето на војната во Украина. Тој на социјалните мрежи напиша дека е во „сериозни разговори“ со рускиот лидер, а во Белата куќа рече дека и украинскиот претседател Володимир Зеленски би можел да допатува во Вашингтон веќе неделава, за да потпише договор за пристап на САД до украинските наоѓалишта за ретки минерали.
Германија издвојува 200 милијарди евра за одбрана
Победникот на изборите во Германија и веројатно иден канцелар Фридрих Мерц започна преговори со социјалдемократите, во обид брзо да обезбеди 200 милијарди евра за одбрана. Претставниците на Демохристијанската унија и СПД сакаат да ги заобиколат строгите ограничувања за задолжување за да се ослободат ресурси за зајакнување на војската, тврдат извори запознаени со ситуацијата.
БЕРЗИ
Европа
Фјучерсите на европските акции утрово се тргуваат претежно во црвено, додека трговците продолжуваат да го анализираат исходот од вонредните парламентарни избори во Германија. Потсетуваме, конзервативната коалиција ЦДУ-ЦСУ на Фридрих Мерц победи на изборите, а формирањето на новата влада се очекува до Велигден. Пред новата влада ќе има неколку предизвици - од подигнување на стагнирачката економија до зацврстување на позицијата на Германија и Европската унија на глобалната сцена.
САД
Од другата страна на Атлантикот, фјучерсите на американските индекси се тргуваат мешано, пред објавувањето на податоците за довербата на потрошувачите. Американските берзи и тргувањето во понеделникот го завршија тргувајќи меѓу добивки и загуби, во очекување на објавувањето на деловните резултати на „Енвидија“ (Nvidia). Истовремено, акциите на „Епл“ (Apple) пораснаа, откако компанијата најави инвестиција од 500 милијарди долари во САД во наредните четири години и отворање на 20.000 нови работни места.
Азија
Кога станува збор за акциите во азиско-пацифичкиот регион, тие забележаа најголем пад во последните три недели, бидејќи одлуката на американскиот претседател да ги ограничи кинеските инвестиции го намали апетитот за ризик. Најголеми загуби забележаа акциите во Јапонија, Тајван и Хонгконг.
.webp){kind=icon}
