Нафтата порасна по млаката сесија во понеделникот, додека трговците ги следеа најновите потези на САД во трговската војна и изгледите за лабави ограничувања на иранската нафта. Брентот се тргуваше по цена од околу 65 долари по барел, откако во понеделникот напредуваше за 0,2 отсто, додека ВТИ (West Texas Intermediate) се држеше блиску до 62 долара. „Блумберг“ (Bloomberg) денеска известува дека одреден степен на смиреност се врати на Волстрит во почетокот на неделата, со акции и обврзници што зајакнаа.
„Макрорасположението засега се стабилизира, а нафтата е на бавен пат кон закрепнување“, рече Хуанг Ванже, аналитичар на компанијата ДФ (Dadi Futures). „Со првиот бран на ’царински цени’, во голема мера запечатени, пазарите сега се подготвуваат за следната фаза - каде што фокусот се поместува на вистинското влијание на побарувачката како што трговската војна ескалира“, додаде тој.
Нафтата месецов поевтини за околу 10 долари бидејќи трговската војна поттикна стравови од глобална рецесија, која би ѝ штетела на побарувачката за енергија, особено во САД и во Кина - најголемите потрошувачи на сурова нафта. Таквата загриженост ги наведе аналитичарите да ги намалат прогнозите за цените, со можност за презаситеност засилена од ненадејната одлука на организацијата ОПЕК+ да го врати производството побрзо отколку што се очекуваше.
ПОЛИТИКА
Царини и за фармацевтските производи?
Администрацијата на американскиот претседател Доналд Трамп започна истрага за увозот на полупроводници и фармацевтски производи, што веројатно ќе резултира со воведување царини за двата сектора. Истрагите ги отвори американското Министерство за трговија, за да се утврди дали увозот на полупроводници и фармацевтски производи претставува закана за американската национална безбедност. Воведувањето царини на овие сектори може да доведе до прекин на синџирите на снабдување и да го погоди работењето на компании како што се „Епл“ (Apple), „Енвидија“ (Nvidia) и фармацевтските гиганти.
Бесент го брани доларот
Американскиот министер за финансии Скот Бесент го минимизира значењето на неодамнешната распродажба на пазарот на обврзници, отфрлајќи ги шпекулациите дека странските инвеститори масовно ги фрлаат американските обврзници. Бесент исто така ја отфрли загриженоста за слабеењето на доларот, наведувајќи дека американскиот долар останува глобална резервна валута.
ЕКОНОМИЈА
БДП на Кина расте
Кинеските официјални лица в среда, веројатно, ќе известат за солиден економски раст на Кина на почетокот на годинава, чија економија, според процените на економистите, пораснала по стапка од 5,2 отсто во првото тримесечје. Иако тоа е нешто побавно во однос на растот од 5,4 отсто од последниот квартал од минатата година, секако е солиден резултат со оглед на предизвиците со кои се соочува кинеската економија. Тука пред сè се мисли на кризата во секторот за недвижности и слабото расположение на потрошувачите.
Европа
Фјучерсите на европските акции утрово се тргуваат претежно со добивки. Потсетуваме, европските берзи и тргувањето во понеделникот го завршија во зелено, откако САД, барем краткорочно, ги иззедоа паметните телефони, компјутерите и другата електроника од своите таканаречени реципрочни царини.
САД
Истовремено, фјучерсите на американските индекси се тргуваат со загуби, откако САД отворија истрага за увозот на полупроводници и фармацевтски производи. Имено, инвеститорите се загрижени дека царините ќе ја турнат американската економија во рецесија, поради што индексот на доларот веќе две недели по ред бележи пад. Потсетуваме и дека приносите на американските десетгодишни обврзници скокнаа минатата недела за 50 базични поени, најмногу во последните две децении.
Азија
Акциите во азиско-пацифичкиот регион се тргуваат со добивки, откако американскиот претседател најави потенцијално паузирање на царините за увоз на автомобили. По добивките предничат акциите во Јапонија, на крилата на растот на акциите на „Тојота“ (Toyota) и „Хонда“ (Honda).
Во фокусот на инвеститорите е и посетата на кинескиот претседател Шји Џјинпинг на Југоисточна Азија, откако во понеделникот слета во Виетнам. Кинескиот лидер потоа ќе отпатува во посета на Малезија и на Камбоџа. Од него се очекува да ја претстави Кина како понадежен партнер од САД и да предложи инвестициска и трговска соработка за зајакнување на заемните врски.
.webp){kind=icon}
