Висок британски министер ги осуди нападите на Илон Маск врз владата како „смешни“ и „срамни“, што води до ескалација на спорот со најбогатиот човек во светот и сојузник на новоизбраниот американски претседател Доналд Трамп.
Главниот извршен директор на „Тесла“ (Tesla Inc.) во последните денови направи низа жестоки објави на својата платформа Х за британскиот скандал за сексуална злоупотреба на деца. Маск во петокот тврдеше дека премиерот Кир Стармер бил „соучесник во силувањето на Британија“ и дека треба да се соочи со обвиненија за неговите постапки како главен обвинител на земјата.
Во таа улога од 2008 до 2013 година, Стармер започна гонење на бандите во британските градови. Во неговата последна година на функцијата, тој нареди темелно преструктуирање на начинот на кој Обединетото Кралство се справува со случаите на злоупотреба на деца, велејќи дека правниот систем ги изневерил жртвите.
Министерот за здравство, Вес Стритинг, во денешните интервјуа за „Скај њуз“ (Sky News) и „Би-би-си“ (BBC) ги отфрли нападите на Маск, тврдејќи дека доверливиот човек на Трамп може да стори повеќе во борбата против злоупотребата ако добро ја искористи неговата улога како сопственик на социјален медиум.
„Смешно е тоа да се каже. Тој е лошо информиран. Ако сака да ги засука ракавите и всушност вистински да направи нешто за справување со насилството врз жените и девојчињата, тогаш онлајн платформите, без разлика дали X или која било од другите платформи, имаат улога во заштитата на луѓето“, рече Стритинг.
Ова не е првпат Маск да се замеша во британската политика. Откако Стармер победи на општите избори во јули, Маск редовно ја критикуваше лабуристичката влада и сега повикува на ново гласање и ги повика Британците да ја поддржат Реформската партија на Најџел Фараж.
„Тој има голема платформа, има моќен глас за да може да каже што сака“, рече Стритинг за Маск. „Она на што сме фокусирани е да се погрижиме да испорачаме правда за да бидеме сигурни дека ќе се справиме со насилството врз жените и девојчињата“, додаде тој.
Маск упати критики и кон министерката Џес Филипс и тоа со доста вознемирувачки тон, повикувајќи ја да поднесе оставка. Нападите кон неа се поради нејзината одлука да го отфрли барањето од Советот од Олдам, Северна Англија, да започне владина истрага за сексуалната злоупотреба на деца во градот, со што таа даде предност на локалната истрага.
Инаку, се чини дека во последниот период стана сосема вообичаено Маск да се меша во политичките состојби надвор од неговата држава. Тој е прилично активен и во предизборниот период во Германија, каде што на нецели два месеца од предвремените избори ги критикува актуелниот канцелар Олаф Шолц од редот на социјалдемократите и кандидатот на Христијанско-демократската унија (ЦДУ), Фридрих Мерц, а јавно дава поддршка за кандидатката на АфД, Алис Вајдел, иако сите други поголеми полотички партии ја отфрлија АфД како опција за коалиција.
Почетниот дел од текстот го напиша Грег Ричи од „Блумберг“.
.webp){kind=icon}
