Велика Британија е загрижена поради иранската нуклеарна програма

Премиерот на Велика Британија, Кир Стармер, искажа „сериозна загриженост“ во врска со нуклеарната програма на Иран и го поддржува правото на Израел на самоодбрана, но повика на деескалација на конфликтот што се заканува да го зафати целиот Блиски Исток.

Стармер зборуваше откако Израел започна серија напади врз Иран, зголемувајќи ги стравувањата од поширока војна во регионот и зголемување на цените на нафтата. Иран брзо одговори со испраќање рој беспилотни летала кон Израел.

„Одамна изразуваме загриженост, сериозна загриженост, за нуклеарната програма на Иран и целосно го признаваме правото на Израел на самоодбрана“, изјави Стармер за „Блумберг њуз“ во интервју во петокот, кратко по разговорите со францускиот претседател Емануел Макрон и германскиот канцелар Фридрих Мерц.

„Но, јас сум многу загрижен за ескалацијата на оваа ситуација, поради што, заедно со Германија и Франција, јасно ставаме до знаење дека деескалацијата сега е неопходна.“

Израелскиот премиер Бенјамин Нетанјаху изјави дека нападите биле насочени кон нуклеарните и балистичките ракетни програми на Иран и дека „ќе продолжат онолку долго колку што е потребно за да се отстрани заканата“. Врховниот лидер на Иран, Али Хамнеи, изјави дека ќе следи „сурова одмазда“.

Стармер рече дека Обединетото Кралство не е вклучено во израелските напади и одби да коментира дали Велика Британија ќе помогне во одбраната на Израел од иранските напад, како што правеше во минатото.

Иран со децении е под сомнеж поради своите нуклеарни амбиции и неговата способност да развие капацитет за лансирање нуклеарно оружје. Исламската Република го зголеми производството на фисилен материјал во последниве години, а неодамнешните анализи сугерираат дека би можела да произведе количина збогатен ураниум потребна за бомба за помалку од една недела.

 

Американскиот претседател Доналд Трамп во петокот го повика Иран да го прифати нуклеарниот договор за да избегне понатамошни напади. Тој рече дека однапред имал сознанија за израелските операции, но не е јасно колку однапред бил информиран.

„Сè уште има време да се запре ова крвопролевање со планирани уште побрутални напади“, рече Трамп на социјалната мрежа Трут. Техеран мора да постигне договор „пред да биде предоцна“, додаде тој.

Кратко по израелскиот напад, државниот секретар Марко Рубио издаде соопштение во кое се вели дека САД не се вклучени во операцијата и го предупреди Иран да не ги напаѓа американските интереси или персонал.

„Израел нè информираше дека верува оти оваа акција била неопходна во негова самоодбрана“, рече Рубио.

Според иранските медиуми, во нападот се убиени командантот на Револуционерната гарда Хосеин Салами и началникот на Генералштабот Мохамед Багери, како и најмалку уште двајца високи членови на ИРГК.

Во моментов нема коментари за веста. Биди прв да коментира...

Остави коментар