Покрај тоа што е врвен музичар, Ник Мејсон, тапанарот на легендарниот бенд „Пинк Флојд“, е и вешт возач и страстен колекционер на тркачки автомобили. Со 77 години и со проценето богатство од 180 милиони долари, тој може да ѝ се посвети на својата страст за тркачкиот спорт во кој и самиот се испроба.
Во 1978 година, користејќи ги приходите од албумот „Dark Side of the Moon“, тој купи тркачко „ферари 250 ГТО“ (Ferrari 250 GTO) за приближно 35.000 фунти. „Тој потег, за кој во најмала рака мислеа дека е ексцентричен, се покажа како многу профитабилна инвестиција на повеќе начини“, вели Мејсон во видеоприлогoт.
Bloomberg
Во 2010 година Ник одби понуда од 30 милиони долари, а во 2013 година колекционерот Пол Папалардо од Гринич, Конектикат, го продаде својот „250 ГТО“ за рекордни 53 милиони долари, што го прави најскап автомобил досега, според „Блумберг“. Пред неколку дена, „ферари 250 ГТО“ од 1962 година беше продадено за рекордни 51,7 милион долари.
За време на турнејата на бендот во 1987 година за албумот „A Momentary Lapse of Reason“, тој го понуди како гаранција за плаќање за да обезбеди доволно средства за концерти низ Европа и Америка. Денес овој автомобил од 1962 година се смета за свет грал меѓу колекционерите. Со само 36 произведени досега, тој го претставува тркачкото наследство на „Ферари“ и е еден од најбараните и највредни автомобили во светот. Неговата вредност денес се проценува на 40-50 милиони долари.
Bloomberg
Колекцијата на автомобили на Мејсон е исклучително разновидна и, покрај гореспоменатото „ферари“, чии перформанси можете да ги видите во приложеното видео, вклучува и некои од највредните и најретки автомобили во светот: „мекларен Ф1 ГТР“ (McLaren F1 GTR), кој некогаш учествуваше на престижната трка „24 часа Ле Ман“, потоа „алфа ромео 8Ц 2300“ (Alfa Romeo 8C 2300), со не помалку интересно тркачко минато. Тука се и „бугати вејрон“ (Bugatti Veyron), врвот на автомобилското инженерство, со рекордна максимална брзина и беспрекорна изработка, и елегантното и ретко „масерати А6ГЦС“ (Maserati A6GCS).
Музичарот, кој е единствениот член на „Пинк Флојд“ што се појавува на секој албум на бендот од неговото формирање во 1965 година, живее со својата сопруга во Велика Британија, во малото гратче Коршам, на работ на Котсволдс. Инаку, неговата куќа во грегоријански стил, изградена од камен од Котсволдс, датира од 18 век. Претходен сопственик била кралицата Камила, која живеела во неа со својот прв сопруг Ендрју Паркер Боулс пред да му ја продаде на Мејсон во 1995 година.
.webp){kind=icon}
Во моментов нема коментари за веста. Биди прв да коментира...