„Порше“ тргна по мнозински удел во „Бугати Римац“

„Порше“ (Porsche), кој поседува 45 отсто од акциите на „Бугати Римац“ (Bugatti Rimac), сега размислува за преземање на мнозинскиот удел за да добие поголема контрола, според германскиот финансиски портал „Менаџер“ (Manager). Разговорите веќе се во тек, што го потврди и основачот и директор на „Римац“, Мате Римац. Тој додаде дека компанијата е добро позиционирана и дека и тие самите би сакале да го зголемат својот удел. Автомобилите на „Бугати“ се распродадени до 2029 година, а заедничката компанија треба повторно да биде профитабилна од 2025 година.

Bugatti Rimac

„Порше“ има проблеми со развојот на електрични модели 

Ако „Порше“ го преземе мнозинството, со тоа треба да се согласат и другите инвеститори. Акционери на „Римац“ се „Хјундаи“ (Hyundai), „Голдман Сакс“ (Goldman Sachs), „Софтбанк“ (Softbank) и „Инвест индустриал“ (Invest Industrial). Преземањето би можело да биде стратегиски поволно за „Порше“, според процените. „Порше“ моментално има многу проблеми. Продажбата опадна по три тримесечја. Продажбата на електрични модели колабира, а доаѓањето на електричниот „макан“ (Macan) беше одложено поради проблеми со софтверот. Имаат проблеми и со развојот на електричниот „кајман“ (Cayman) и „бокстер“ (Boxster), поради што нивното појавување на пазарот може да биде одложено. Производството на електричниот „тајкан“ (Taycan) е намалено на една смена поради ниската побарувачка.

Додека во „Порше“ не сакаа да ги коментираат темите, Мате Римац изјави дека меѓу сопствениците се водат дискусии за можната трансакција. Римац јасно кажа дека успехот на преземањето од „Порше“ не е загарантиран. Освен „Порше“, постојат и други заинтересирани страни, посочи тој.

На овој начин „Порше“ би можел да ја реализира алтернативата на најавениот електричен суперспортски автомобил „мишн екс“ (Mission X). Концептуалниот автомобил беше претставен во 2023 година, но не е јасно дали ќе влезе во сериско производство. Римац веќе летоска призна дека пазарното опкружување се променило и дека најбогатите повеќе не сакаат електрични автомобили. „Порше“ би сакал да го преземе „Бугати Римац“ (Bugatti Rimac), што би можело да има стратегиски добар ефект. Останува прашањето колку би чинело преземањето на компанијата. Мнозинскиот сопственик на „Порше“ – концернот „Фолксваген“ (Volkswagen) – моментално има многу проблеми, ги намалува трошоците, ги намалува платите и размислува дури и за затворање фабрики.

Мате Римац, кој се грижи за техничкото водство, беше предмет на критики. „Порше“ се жали дека процесите во компанијата се слабо организирани. Исто така, електричниот суперспортски модел „невера“ (Nevera) се продава полошо од очекувањата. „Бугати Римац“, со приходи од 336 милиони евра во 2023 година, забележа загуба од 17 милиони евра, според извештаите. Загубите во минатата година Римац ги оправдува со високите инвестиции во нови модели, вклучувајќи ја и платформата „турбијон“ (Tourbillon) со три електромотори.

Rimac Grupa

„Бугати“ беше дел од групата „Фолксваген“ во времето на поранешниот шеф и главен акционер на „Фолксваген“, Фердинанд Пиех, но не се вклопуваше во концептот на подоцнежниот извршен директор Херберт Дис. Вклучувањето во заедничка компанија со „Римац“ се чинеше како добар начин за надградба на „Бугати“ во електричен бренд. Мнозинското преземање од „Порше“ не би го променило таквиот концепт, според извештаите.

Во моментов нема коментари за веста. Биди прв да коментира...

Остави коментар