Големо враќање на суперавтомобилите со огромни мотори

„Астон Мартин“ (Aston Martin) штотуку го претстави својот најнов водечки модел „ванкуиш“ (Vanquish). Со цена од 429.000 долари, ова моќно купе со каросерија од јаглеродни влакна е полуксузно и поспортско од ДБС (DBS) на чиешто место доаѓа. Има луксузна внатрешност од кожа и кашмир и достигнува максимална брзина од 344 км/ч., што е најголема брзина за кое било сериско возило на „Астон Мартин“. Неговиот нов 5,2-литарски В-12 мотор со двоен турбополнач произведува 824 коњски сили, што е значително зголемување во однос на 759 КС на неговиот претходник.

Новиот „ѕвер“ на „Астон“ се придружува на групата целосно нови суперавтомобили со шест и седумцифрени цени, вклучувајќи ги „ферари 12 цилиндри“ (Ferrari 12Cilindri) со 819 КС од 423.000 долари и хибридниот „ламборгини ревуелто“ (Lamborghini Revuelto) со 1.000 КС и цена од 604.000 долари. Сите овие автомобили имаат мотори со 12 или 16 цилиндри, кои обично се поголеми и помоќни од нивните претходници.

Aston Martin

Овој тренд е во спротивност со актуелните стандарди во автомобилската индустрија. Производителите како „Ауди“ (Audi), „Бентли“ (Bently), БМВ (BMW) и „Мерцедес-Бенц“ (Mercedes – Benz) неодамна ги елиминираа 12-цилиндричните мотори од својата понуда, преминувајќи на помали турбомотори со 6 или 8 цилиндри, често во комбинација со електрификација. Построгите стандарди за економичност на горивото и емисиите се клучни причини за овие промени, заедно со притисокот да се преориентира автомобилската индустрија кон електрични возила.

Сепак, овие големи и моќни машини претставуваат еден вид реакциски импулс на врвот на автомобилскиот пазар. „Најбогатите купувачи сакаат да имаат повеќе цилиндри“, вели Алекс Лонг, директор за производи и стратегија во „Астон Мартин“. „Иако можевме да постигнеме слични перформанси преку различни методи, В-12 е единствен и синоним за нашиот бренд. Тие го сакаат тој пулс на моторот“.

Овие мотори обезбедуваат уникатни механички карактеристики, за кои индустрискиот аналитичар Сем Абуелсамид истакнува дека даваат чувство на „автентичност“. Лонг ги споредува со некој префинет швајцарски часовник: „Можеби не е најпрецизниот часовник, но луѓето ги сакаат механиката и начинот на кој функционира“, вели тој, нагласувајќи ги минималните вибрации, моменталната испорака на енергија и „емотивниот баритон“ на издувниот систем. .

Додека суперлуксузните автомобили како „ролс-ројс спектра“ (Rolls-Royce Spectre) и хиперавтомобилите како „римац невера“ (Rimac Nеvera) се движат кон тишината на батерискиот погон, овие големи бензински мотори ги евоцираат класичните суперавтомобили од 1960-тите, 1970-тите и 1980-тите, особено во однос на доживувањето за самиот возач.

Колекционерите во овој ексклузивен сегмент го бараат ова длабоко, моќно искуство. „Се чувствувате како да го контролирате огнот додека одекнуваат малите експлозии од моторот“, вели Џефри Ајнхорн, адвокат од Њујорк и колекционер на автомобили, додавајќи дека со моторот В-12 имате дванаесет од тие експлозии и се чувствувате како „крал на кралевите“.

Lamborghini Revuelto

Ајнхорн неодамна го замени својот 12-цилиндричен „астон мартин“ за 12-цилиндрично „ферари“ и го вози редовно, претпочитајќи ги леснотијата на управување и „оперетскиот“ звук во споредба со бруталната моќ на неговото шестцилиндрично „порше 911 ГТ3РС“ (GT3RS) и динамичната природа на неговата „тојота ГР корола сркут“ (Toyota GR Corolla Circuit) со три цилиндри.

Со оглед на сè построгите стандарди за ефикасност, создавањето на вакви големи мотори претставува значителен инженерски и финансиски предизвик. Тоа вклучува дизајнирање мотори што ќе бидат имплементирани во автомобилите доволно долго за да се амортизираат трошоците за развој. „Моторите В-12 се екстремно тешки за производство во оваа модерна ера на согорување“, вели Лонг, истакнувајќи дека тие мотори се „обезбедени за усогласеност со регулативата во 2030-тите. „Вложуваме многу пари и време на усогласување со регулативите“.

Затоа нивното присуство во возилото го означува како премиум производ. „Тоа е многу посебен мотор, така што го поврзувате со многу посебен автомобил“, вели Лонг. Тој додава дека моторот В-12 на „Астон Мартин“ ќе се инсталира само во производи со цени „од ‘ванкуиш’ па нагоре“, што значи дека тие ќе бидат претежно ограничени серии или уникатни модели. Оваа реткост и посакуваност им помагаат на производителите да ја оправдаат значајната „премиум цена“ за таквите модели, вели Матео Ортенци, директор на производствената линија во „Ламборгини“. Тоа води до долги листи на чекање и поголем профит. Ортенци наведува дека „ревуелто“ е распродадено во следните две и пол години.

Според Абуелсамид, производителите на автомобили во мали серии, како што се „Бугати“  и „Ламборгини“, кои се дел од  групацијата „Фолксваген“, како и независните производители како „Астон Мартин“ и „Ферари“, добиваат посебни олеснувања поради одредени федерални прописи за ефикасност. Овие автомобили, сепак, подлежат на (релативно занемарлив) данок на потрошувачка на гориво во некои јурисдикции.

Bugatti.com/Официјални фотографии

На дневна основа овие автомобили ги користат малку клиенти. „За секојдневно возење во град“, вели Лонг, „нашите клиенти веќе користат електрични автомобили“. Ајнхорн има големо искуство со електрични возила, но моментално не поседува таков од лични причини. „Ми недостигаат бучавата, вибрациите и грубоста - мирисот и чувството да се има контрола над тие 12 мали експлозии во моторот“, вели тој. „Ако нема менувач, звук и мирис, повеќе од половина од уживањето се губи (Тој се шегува: „Имам електричен автомобил за патување - тоа е метрото“.

Со мало сериско производство во три или четири цифри на глобално ниво, овие суперавтомобили се „капка во океанот кога станува збор за емисиите“, вели Мате Римац, директор на „Бугати“. „Тие едвај се возат - во просек помалку од 1.000 милји годишно. Така што би можеле да одат и на јаглен; тоа не би направило разлика“.

Постојаната посветеност на автоиндустријата кон внатрешното согорување делумно се заснова на верувањето во кодексот и клиентелата што ги отфрла нормите. „Тоа е на некој начин бунт“, признава Римац. Ортенци од „Ламборгини“ го кажува тоа уште поточно: „Не брзаме да го прекинеме производството на моторот В-12 или да се префрлиме на друг тип на мотор додека не бидеме натерани“.

Згора на тоа, самиот Римац, директор на „Бугати“, забележува дека автомобилите со такви мотори се симбол на технолошките достигнувања и човечката генијалност. „Овие автомобили се уметност. Зошто би ги забраниле? Дали би забраниле слики?“